“შეიძლება იყოს ვირუსი, ან ბაქტერია, ან ინტოქსიკაცია, ან ბევრი რამ” – სოფო ცერცვაძე კლინიკაში მოთავსებულ პატარა პაციენტებზე

იაშვილის სახელობის ბავშვთა ცენტრალური საავადმყოფოს პედიატრიული განყოფილების ხელმძღვანელი, სოფო ცერცვაძე, “ნეტგაზეთთან” ამბობს:

„ძირითადი სიმპტომები არის გასტროენტერიტი — ღებინება, მუცლის ტკივილი… ეს ვირუსის სიმპტომიც შეიძლება იყოს და ინტოქსიკაციისაც და ბევრი რამის… კონკრეტულად რაიმე ინტოქსიკაციას უკავშირდება თუ არა, ამის დასადგენად მოკვლევა დაწყებულია. ჩვენ აქტიურად ვთანამშრომლობთ შესაბამის უწყებებთან და დაადგენენ. გასტროენტერიტით, ღებინებით მიმდინარე ბევრი ვირუსი და ბევრი ბაქტერია არსებობს, კონკრეტულად ამ შემთხვევაში გამომწვევი რა იყო, ამის იდენტიფიცირება ჯერჯერობით არ არის შესაძლებელი“,

ცნობისთვის, ვირუსული, ბაქტერიული ინფექციებისა და ინტოქსიკაციის (მოწამვლის) მკურნალობის მეთოდები ერთმანეთისგან მკვეთრად განსხვავდება, რაკი მიზეზი დაუდგენელია, სავარაუდოდ, პატარა პაციენტებს, მხოლოდ სიმპტომური მკურნალობა უტარდებათ. 

კონკრეტულად, რომელ შესაბამის უწყებებთან თანამშრომლობს კლინიკა და ვისგან ელის, რომ “დაადგენენ” გამომწვევ მიზეზს – უცნობია. 

ლოგიკურადაც და პროტოკოლურადაც, ერთ-ერთი უწყება, რომელიც ამ კუთხით უნდა მუშაობდეს აქტიურად, არის დაავადებათა კონტროლის და.საზოგადოებრივი ჯანდაცვის ეროვნული ცენტრი, რომელიც, სიმპტომების აფეთქებიდან 48 საათის შემდეგაც კი – სდუმს!

18 სექტემბერს, დილიდან გავრცელდა ინფორმაცია, რომ ათეულობით ბავშვი, რომელიც თბილისის საჯარო ბაგა-ბაღში დადის, წუხელ კლინიკაში მოხვდა ინტოქსიკაციის ნიშნებით.

ბავშვები პირღებინებას და მუცლის ტკივილს უჩიოდნენ.

ეს ამბავი დაადასტურა თბილისის საბავშვო ბაგა-ბაღების მართვის სააგენტომ, ვისი განცხადებიდანაც გავიგეთ, რომ ბავშვებს დაუფიქსირდათ ცხელება, რიგ შემთხვევებში გულისრევა და ღებინებაც. სააგენტოს ცნობით, ეპიდემიოლოგების რეკომენდაციით, 7 საჯარო ბაღში სააღმზრდელო პროცესი შეჩერდა.