შინაგან საქმეთა მინისტრი, ვახტანგ გომელაური, რუსთავი2-თან, კითხვას, როგორ დაასკვნა ექსერტიზამ, რომ ლექსო ლაშქარავას გარდაცვალება კავშირშია ნარკოტიკულ ნივთიერებებთან, როდესაც სასამართლო სამედიცინო ექსპერტიზებს მინიმუმ 25 დღე სჭირდება, ასე უპასუხა:
“შეიძლება 25 დღეც დასჭირდეს ექსპერტიზას, 30 დღეც და მეტიც… ჩვენ დასკვნა არ გაგვიჟღერებია, ტელევიზიებმა წინასწარ დაანონსეს მისი გარდაცვალების მიზეზი… აგერ არის ტელევიზიებში გასული ჩვენი ბრიფინგები. ეგ არ ყოფილა, რითი გარდაიცვალა… იყო ფაქტი სად მოძრაობდა, დეტალებში არ მინდა შევიდე ოჯახი რომ არ გავაღიზიანო, იყო ნარკოტიკების თემა და ბოლოს დაიდო ქიმიური ექსპერტიზის დასკვნა, რომელსაც სჭირდება ნაკლები დრო, ვიდრე 25 დღე და იქ დაფიქსირდა, სისხლიდან ამოვიდა დიდი დოზის ნარკოტიკის შემცველი… მისი გარდაცვალება შეიძლება გამოიწვია მან (ნარკოტიკმა), შეიძლება – არა , საბოლოო დასკვნა უნდა დადოს სასამართლო სამედიცინო ექსპერტიზამ.
იცით, რომ ჩართულები არიან დამოუკიდებელი ექსპერტები, ჩვენ თვითონ შევთავაზეთ, სხვათა შორის, და ოჯახმა ჩართო. ასევე, შეთავაზებული გვაქვს, რომ ამ ექსპერტიზის შემდეგაც ჩავრთოთ უფრო მაღალკვალიფიცირებული ექსპერტები. მე, რა თქმა უნდა, ეჭვქვეშ არ ვაყენებ ქართველ სპეციალისტებს, მაგრამ ეს იმისთვის ხდება, რომ ოჯახი დარწმუნდეს იმაში, რომ ეს მართლაც ასეა.
შევთავაზეთ, რომ ჩავატაროთ უცხოეთში, თავად მოიძიონ, აირჩიონ რომელი ქვეყანა უნდათ, ჩვენ დაველაპარაკებით და ჩავატაროთ კიდევ ერთხელ იმის დასადგენად, თუ რა იყო გარდაცვალების მიზეზი”
“ალია” შეგახსენებთ, ქიმიური ექსპერტიზის დასკვნას შესაძლოა, მართლაც ნაკლები დრო სჭირდება ზოგადად, მაგრამ, მაგალითად, თამარ ბაჩალიაშვილის შემთხვევაში, იგი გარდაცვლილი იპოვეს 22 ივლისს, ხოლო ქიმიური ექსპერტიზის დასკვნა მის საქმეში თარიღდება 19 აგვისტოთი.
კომენტარები