“მინდა შემოგთავაზოთ კიდევ ერთი სიახლე” – “თბილისის მერმა” კახა კალაძემ არჩევნების მეორე ტურამდე დაპირებები გასცა და მთავრობის სხდომაზე ის გადაწყვეტილებები გააჟღერა, რომელიც მისი თქმით, 2022 წლის იანვრიდან ამოქმედდება.
კალაძემ ახალი დაპირებები პანდემიის პირობებში მძიმე ვითარებაში მყოფი მცირე და საშუალო ბიზნესის დახმარებით ახსნა. მისი თქმით, ბიზნესის მხარდაჭერის პროგრამა პროექტის სახით თბილისის საკრებულოს უკვე გადაეგზავნა.
“მუნიციპალიტეტისა და მუნიციპალური საწარმოების მოიჯარეებს გავათავისუფლებთ 2021-2022 წლის გადაუხდელი საიჯარო გადასახადისგან. იმის გამო, რომ პანდემიის შედეგად მათი ეკონომიკური აქტივობა შემცირდა, საიჯარო ვადების კორექტირებას ვთავაზობთ 2 წლით. რაც ნიშნავს, რომ პირდაპირი წესით 2 წლით გავუხანგრძლივებთ საიჯარო ვადებს.
იმ პირებს, რომლებსაც 2020 წლის 1 იანვრიდან 2022 წლის 1 იანვრამდე გაუვიდათ ან გასდით საიჯარო ხელშეკრულების ვადა მუნიციპალიტეტთან, ან მუნიციპალურ საწარმოებთან, შევთავაზებთ საიჯარო უფლების 2 წლით აღდგენას. ამავე პერიოდში საიჯარო ხელშეკრულების გადასახადის პირგასამტეხლოების ჩამოწერა მოხდება.
ტურისტული ობიექტები, სასტუმროები, რესტორნები და სხვები ერთჯერადად გათავისუფლდებიან დასუფთავების მოსაკრებლისგან.”,- თქვა კახა კალაძემ.
კომენტარები