“საწოლების მობილიზება ქუჩის აქციების შემდეგ მოხდა” – ჯანდაცვის მინისტრის კიდევ ერთი სკანდალური განცხადება

როდესაც ჯანდაცვის სამინისტრომ დააფიქსირა, რა შედეგები შეიძლებოდა მოჰყოლოდა ქუჩაში გამართულ აქციებს, დროულად მოხდა დამატებითი საწოლების მობილზება, – ამის შესახებ ჯანდაცვის მინისტრმა, ეკატერინე ტიკარაძემ საკოორდინაციო საბჭოს სხდომის დასრულების შემდეგ განაცხადა.

„ვცდილობთ, ვმართოთ ნაკადები და ჩვენს ყველა მოქალაქეს გაეწიოს სამედიცინო მომსახურება. ასევე, ვზრუნავთ სასტუმრო სექტორშიც მობილიზაციაზე, სადაც  ჩართული გვაქვს სამედიცინო მეთვალყურეობა. ვგულისხმობ არა მხოლოდ ექიმების და ექთნების ჯგუფს, არამედ სასტუმროებს ჰყავთ თავიანთი კურატური კლინიკები, სადაც პაციენტები განსაზღვრულ დროს გადიან შესაბამის კლინიკურ კვლევებს, რის შედეგადაც, მათ ენიშნებათ მკურნალობა. ასევე, სასტუმროებში არის იმის საშუალება, რომ პაციენტებმა, საჭიროების შემთხვევაში, მიიღონ სტაბილიზაციის კომპონენტები, რაც გულისხმობს ჟანგბადის კონცენტრატორებით მათთვის ჟანგბადის მიწოდებას.

ასევე, ჩვენ ვისაუბრეთ კლინიკების წარმომადგენლებთან საწოლფონდის ეფექტურ მართვასთან დაკავშირებით. ჩვენ ოქტომბერში საწოლფონდზე საშუალო დაყოვნება გვქონდა 8,52 დღე და ინტენსიურ საწოლზე – 10,25 დღე, ხოლო სამინისტროს აქტიური ჩართულობით, ახლა სტაციონარში დაყოვნება გვაქვს თერაპიულ საწოლზე 5,72 დღე, ხოლო  კრიტიკულ საწოლზე 8,59 დღე, რაც ჰოსპიტალში მკურნალობაზე ხელმისაწვდომობას ზრდის“, – განაცხადა ეკატერინე ტიკარაძემ.

“ალია” ჯერ კიდევ 26 იანვარს, დიახ, 26 იანვარს წერდა, რომ საწოლების მობილიზება უნდა დაეწყოთ, ოპოზიცია კი, არჩევნებამდე ბევრად ადრე ამბობდა, რომ არჩევნების შემდეგ, ხმების დასაცავად გამოსვლა თუ დასჭირდებოდა, გამოვიდოდა ქუჩაში და მაინც, საწოლფონდის დამატება, თურმე აქციების მერე დაწყებულა!