პოლიტოლოგი, ლევან ლორთქიფანიძე:
ძალაუფლება ავადმყოფობაა. თუ განსაკუთრებული შინაგანი საყრდენები არ გაქვს, შეიძლება ძალიან გაგიტაცოს, ყველაფერს მოგწყვიტოს, რეალობის შეგრძნება დაგაკარგვინოს.
ალბათ, ზემოთ ვერ ხვდებიან, თუ რა ენერგია დატრიალდა, რა ცეცხლი დაინთო დღეს პეტრიაშვილის ქუჩაზე.
21-ე სკოლის (მე-6 გიმნაზიის) განადგურების, დანგრევის, სხვადასხვა შენობებში მიმოფანტვის წინააღმდეგ ასობით ადამიანი იდგა ქუჩაში.
ვერ წარმოიდგნეთ, რა კარგი იყო! ასი წლის უნახავი თანაკლასელები გულში იკრავდნენ ერთმანეთს, დაბერებული მოსწავლეები გაახალგაზრდავებულ მასწავლებლებს ახსენებდნენ ძველ ამბებს, მშობლებად ქცეული კურსდამთავრებულები ახალი ეპოქის “მეექვსელობის” ნიშნებს გვიხსნიდნენ… ადამიანები, რომლებიც სხვა საქმეში შევხვედრივართ ერთმანეთს, პირველად გადავიკვეთეთ, როგორც თანასკოლელები და ესეც გვხიბლავდა… ვნახე ჩემი კურსელები და სტუდენტები, რომლებიც ამასობაში ჩემი სკოლის საზოგადოების ნაწილი გამხდარან.
მასწავლებლები, მოსწავლეები, მშობლები კი დიდ განსაცდელში არიან, მაგრამ დღეს უკეთ იცნობენ ერთმანეთს, უფრო ახლოვდებიან, ძველ წყენებს ივიწყებენ, ახალ გადაკვეთის წერტილებს ეძებენ, ერთ მუშტად იკვრებიან და იციან, რომ წინ დიდი უღელტეხილი ელით. იციან, მზად არიან, შემართულნი არიან!
უბანი, ქალაქი, ირმა სოხაძე სოლიდარულია მათ მიმართ.
საწინააღმდეგო მხარეს რომ ვიდგე, ძალიან შემეშინდებოდა.
ცხოვრებისეული თავგადასავლებით, უძვირფასესი მოგონებებით, სკოლის იდეითა და ღირებულებებით, ბრძოლის ხალისით შეკავშირებული თაობების, მათი წინააღმდეგობის გატეხვა ოპოზიციური პარტიიდან მაჟორიტარი დეპუტატის ყიდვა არ გეგონოთ.
🔴 დაუყოვნებლივ ჩაინიშნოს ჩატარებული ექსპერტიზის განხილვა, დაინიშნოს ალტერნატიული და ფუნდამენტური, დამოუკიდებელი ექსპერტიზა.
🔴 მთელი სკოლა დროებით გადაიყვანონ ერთ შენობაში!
🔴 არ დაანგრიონ ჩვენი ჰოგვორთსი, დაიწყოს სკოლის რეაბილიტაცია.
🔸️ ჩემი, როგორც რიგითი კურსდამთავრებულის, პირადი მოთხოვნაა – მაღალი თანამდებობის ყველა იმ პირის დასჯა, ვის კისერზეცაა საქმის აქამდე მიყვანა.
სკოლა არ უნდა დაინგრეს!
P.S. ჩემთვის დიდი პატივი იყო, როდესაც დღეს მიკროფონთან მიხმეს, მაგრამ დავიმალე… ცენტრიდან მანანა მასის გამჭოლ მზერას ვგრძნობდი, მარჯვნიდან ქ-ნ მაიას აწეული წარბი დავლანდე და უკან მაკა მასიც მეგულებოდა… შენი ჭირიმე რაა…
კომენტარები