“საქართველოს, რომლის პრეზიდენტიც ციხეში შიმშლისაგან დაიღუპება, ნატოში არასოდეს მიიღებენ” – დავით ბაქრაძე

საქართველოს პარლამენტის ყოფილი თავმჯდომარე და ამჟამინდელი დეპუტატი, დავით ბაქრაძე ფიქრობს, რომ მიხეილ სააკაშვილის პატიმრობა საქართველოს საერთაშორისო იმიჯზე უარყოფითად აისახება.
ამის შესახებ ბაქრაძემ „ჯორჯიან თაიმსის“ ეთერში, გადაცემაში „დროული კითხვები“ ისაუბრა.

„საქართველოს ჰყავს ბევრი სკეპტიკოსი, ევროპაში, ამერიკაში, რომლებთანაც რუსეთი მუშაობს და არწმუნებს, რომ საქართველო არ იმსახურებს ნატოში და ევროკავშირში ყოფნას. 
და ყველა ასეთი სკეპტიკოსისთვის ციხეში მყოფი სააკაშვილი იმ პირობებში, როცა ყველა აღიარებს დღეს, რომ საქართველოში არ არსებობს დამოუკიდებელი სასამართლო,არის საგანგაშო სიგნალი.

თუ შენ არ გაქვს დამოუკიდებელი  სასამართლო და შენი პრეზიდენტი ციხეშია, ეს არის სიგნალი, რომ ქვეყანა ვერ აკმაყოფილებს დემოკრატიის სტანდარტს. ამიტომ საქართველოსთვის, ციხეში მყოფი სააკაშვილით ნატოსკენ მიმავალი გზა იქნება კიდევ უფრო რთული და სამწუხაროდ ეს იქნება ძალიან მძიმე შემაფერხებელი,“- განაცხადა დეპუტატმა.

მისი თქმით, გამოსავალია მოსაძებნი სააკაშვილის შიმშლობასთან დაკავშირებით.
“ღმერთმა დაიფაროს, საქართველო, რომლის პრეზიდენტიც ციხეში შიმშლისაგან დაიღუპება, ამ საქართველოს ნატოში არასოდეს მიიღებენ. ამის გარანტიას გაძლევთ,” განაცხადა დავით ბაქრაძემ.

ცნობისათვის, საქრთველოს მესამე პრეზიდენტი მიხეილ სააკაშვილი სამრთალდამცავებმა 1 ოქტომბერს დააკავეს. ის რუსთავის მე-12 პენიტენციურ დაწესებულებაში იმყოფება და დაკავების დღიდან შიმშლობს.
მიხეილ სააკაშვილის გათავისუფლების მოთხოვნით, ხვალ თბილისში მასშტაბური აქციის გამართვა იგეგმება.