ჟურნალისტი, ვიკა ბუკია:
ჩვენი უბნის ნიკორასთან გავაჩერე მანქანა 5 წუთით. შეიძლება 3 წუთითაც. ჰოდა, გამოვდივართ მე და მაშო და ვხედავთ, რომ მანქანა, რომელიც ზუსტად 2 წუთით გავაჩერე არასაპარკინგე ადგილას, დაუხაზავში, იქ, სადაც ხელს არავის ვუშლიდი, საერთოდ არავის, აწეულია ჰაერში ევაკუატორის მიერ.
ხელს არავის ვუშლიდი, მაგრამ ვარღვევდი კანონს, სადაც წერია, რომ „დგომა აკრძალულია“. და მოგეხსენებათ, დგომა აკრძალულია ახალ წლამდე რამდენიმე საათით ადრეც, იქ, სადაც მთელი ქუჩა გადათხრილია და შეუძლებელია მანქანის ნორმალურად დაყენება არა მხოლოდ ახალ წელს, არამედ ჩვეულებრივ დღეებშიც.ჰოდა, გამოვდივარ და ვხედავ: სამი პუნტულა კაცი უდიდესი ენთუზიაზმით ასრულებს თავიანთ მოვალეობას. ერთი შიგნით მანქანაში იჭყიტება ღრეჭვით და რას ხედავს, იცით? შიგნით არის ნამცხვრები და ტკბილეული, ნინიას საახალწლო ელზას კაბა საკიდზე, შეფუთული საჩუქრები, გაზიანი სასმელები, ხილი და ფუმფულა ცხენი.ეს ყველაფერი დაინახეს და მაინც გააგრძელეს თავიანთი საქმე ხალისითა და სიყვარულით. ახალ წელს მიჰქონდათ საჯარიმოზე არათუ მანქანა, არამედ მთელი ჩემი და ჩემი შვილების ახალი წელი.მანქანა მაინც მოვახსნევინე, მაგრამ ძალიან იყოყმანეს. ბოლოს შევკივლე, ორსულად ვარ-მეთქი, და ჩამოხსნეს (ამჯერად არ ვარ).ამ ამბის მორალი ისიცაა, რომ არასდროს არ უნდა დააყენოთ მანქანა უადგილო ადგილას. და თუ გგონიათ, რომ არსებობს განსაკუთრებული დრო ამ 365 დღეში, როცა თქვენი ფუმფულა ცხენების, ნამცხვრების და გოზინაყების გამო უკანონობას ვინმე შეგარჩენთ, ცდებით.ჩვენ ვცხოვრობთ დემოკრატიაში, სადაც კანონი „დგომა აკრძალულია“ ნიშნავს აკრძალულ დგომას ახალ წელსაც, შობასაც და აღდგომასაც. რამეთუ ჩვენ ვცხოვრობთ ქვეყანაში, სადაც კანონი უზენაესია.გაუმარჯოს ჩვენს დემოკრატიულ საქართველოს და ენა მიიგდეთ.
ის სამი კაცი სადაა ახლა, მაცოდინა. ახალ წელს მე მათ სადღერგძელოს დავლევ, ბიჭების, ვინც ახალი წლის დღეებშიც ასრულებს თავის მოვალეობას პირნათლად. გმირები
კომენტარები