სალომე ზურაბიშვილი იტყუება? – რას უყვება „ალიას“ დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრაობა „ტრიბუნას“ ლიდერი, დავით ჭიჭინაძე.

– ბატონო დათო, პრეზიდენტი  სალომე ზურაბიშვილი სტრასბურგში არ გაემგზავრა, სადაც სიტყვით უნდა გამოსულიყო და განაცხადა, რომ პრემიერმა დაბლოკა მისი ვიზიტი. არადა, მთავრობის ადმინისტრაციამ  გაავრცელა ინფორმაცია, რომ პრემიერს პრეზიდენტმა უცხოეთში გამგზავრების დასტურის მისაღებად  12 აპრილს მიწერა, მეორე დღეს,  13 აპრილს, მიიღო წერილობითი თანხმობა. ევროსაბჭოში ზურაბიშვილი კი 18 აპრილს უნდა გამოსულიყო სიტყვით. მოკლედ, პრეზიდენტს დრო ჰქონდა და მაინც არ წავიდა სტრასბურგში. ხელისუფლება და ოპოზიციის ნაწილი აცხადებენ, რომ პრეზიდენტმა მოიტყუა, არავის დაუბლოკავს და სტრასბურში იმიტომ არ ჩავიდა, რომ იქ ჩასასვლელი პირი არ ჰქონდა, ევროსაბჭო, ევროპელი პოლიტიკოსები მისგან კონკრეტულ ნაბიჯებს მოითხოვდნენ და  იმის მოსმენა აღარავის სურდა, რაც უკვე არა ერთხელ განუცხდებიაო. ეს რამდენად დამაჯერებელია?

– ისეთი სიტუცია, როგორიც საქართველოშია, პრობლემებს უქმნის პრეზიდენტსაც და ე.წ. დემოკრატიის სხვა მოთამაშეებსაც. რეალურად, ჩვენ ვხედავთ, რომ აქ არც ადამიანის უფლებებზეა ლაპარაკი და არც რაიმეს დამოუკიდებლობასა და თავისუფლებაზე. აქედან გამომდინარე, ჩვენ უნდა მივხვდეთ, რომ სალომე ზურაბიშვილი  ყოველთვის იქნება  ბიძინა ივანიშვილის რუპორი ანუ, ახმოვანებს  მის განცხადებებს და არავითარი დამოუკიდებელი მოთამაშე ის არ არის. ბიძინა ივანიშვილი სალომე ზურაბიშვილის მეშვეობით ცდილობს დასავლეთთან საკუთარი და მასთან დაახლოებული ადამიანების უსაფრთხოება და მომავალი დაალაგოს. ამას არავითარი კავშირი არ აქვს იმასთან, რომ ზურაბიშვილს რაღაც დაპირისპირება აქვს ივანიშვილთან და არ ითვალისწინებს მის კონკრეტულ პოზიციებს. „ქართული ოცნება“ და სალომე ზურაბიშვილი დაპირისპირებულნი რომ არიან, ეს ჩვეულებრივი ამბავია. „ქართული ოცნების“ დეპუტატები, რომ გაიძახიან, ზურაბიშვილის პრეზიდენტად არჩევაში დიდი წვლილი მიგვიძღვისო, ეს ივანიშვილის წვლილია. ივანიშვილმა გადაწყვიტა მისი პრეზიდენტობა და გახადა კიდეც. „ქართულ ოცნებიდან“  ვინმე შეეწინააღდეგებოდა ივანიშვილს და მის დავალებებს საპრეზიდენტო არჩევნების დროს არ შეასრულებდნენ? რასაც ეუბნებოდა, იმას აკეთებდნენ. შესაბამისად, პრეზიდენტი არ თვლის თავს ვალდებულად, რომ „ქართულ ოცნებას“  რაიმეში ანგარიში გაუწიოს, იყოს კობახიძის ან ღარიბაშვილის დაქვემდებარებაში.  ეს კიდევ ერთხელ მიანიშნებს, რომ რაც სასიცოცხლოდ მნიშვნელოვანია ივანიშვილისთვის, ზურაბიშვილი მას იმ საკითხებში არ უპირისპირდება. ევროსაბჭოში პრეზიდენტის გამოსვლა და ივანიშვილისთვის სხვა მეორეხარისხოვან საკითხებში უპირისპირდება „ქართულ ოცნებას“. გარდა ამისა, ყველამ ვიცით, რომ ჩვენთანაც, ევროპაშიც ელოდნენ, რომ  ზურაბიშვილი შეიწყალებდა ნიკა გვარამიას და ასე ვთქვათ, ხელდამშვენებული ჩავიდოდა სტრასბურგში. არ შეიწყალა, ევროსაბჭოს იმედები გაუცრუა და ახლა პრემიერს აბრალებს, რომ მან შეუშალა ხელი ამ ვიზიტში. ერთმანეთის ჯინაზე აკეთებენ ყველაფერს.  საბოლოოდ, არც იმას გამოვრიცხავ, რომ მთავრობამ ზურაბიშვილის ბრალდების საპასუხოდ, მოგვიანებით შექმნა დოკუმენტი წინა თარიღით და არც იმას, რომ ზურაბიშვილმა მოიტყუა.