როგორც გვეუბნებიან, მაჟორიტარების მიმართულებით რამდენიმე ისეთი კანდიდატი იქნება, პირს მხოლოდ მოსახლეობას კი არა, „ოცნების“ წევრებსაც დააღებინებსო. საუბარი იმის შესახებ, რომ მაჟორიტარად თბილისში მაგალითად დავით სერგეენკოც შეიძლება მოგვევლინოს, არის, ზუსტად ისე, როგორც საუბარია იმაზე, რომ მაჟორიტარად დედაქალაქში კენჭი იყაროს მამუკა მდინარაძემაც. საქმე ისაა, რომ მდინარაძემ კარგად იცის, ან მაჟორიტარი უნდა იყოს, ან სიაში არავინ ჩაწერს. ანუ, მან უნდა დაამტკიცოს, რომ ამომრჩეველი ჰყავს და რაღა თქმა უნდა, საბურთალოს უმიზნებს, ზუსტად ისე, როგორც სერგეენკო განიხილება საბურთალოს ოლქში. ვერ გეტყვით რატომ, მაგრამ ხელისუფლებას საბურთალო ადვილი მოსაგები ჰგონია, ოპოზიციას – პირიქით, რთულად ეჩვენება ამ უბნის მოგება და ამიტომაცაა, იმ ორი ოლქიდან ერთ-ერთი, რომელიც გაერთიანებულმა ოპოზიციამ აიცილა, სწორედ საბურთალოა და დიდი ალბათობით, მას „ლელოს“ და ბადრი ჯაფარიძეს შეატოვებენ.
და ერთიც – გასული კვირიდან დაიწყო და ამ კვირაშიც გაგრძელდება უმრავლესობის წევრების ნაწილის „გაშავება“ და ტელევიზიით მათი ბიზნესინტერესების გამომზეურება. ეს იმიტომ კეთდება, რომ შემდეგ ამ ადამიანებს მარტივად უთხრან, რეიტინგი გაგინულდათ და გვერდზე უნდა გადგეთო. ბოლოს კი იმასაც გეტვით, რომ დაანონსებული 15 ივლისის ნაცვლად, ხელისუფლება 30 მაჟორიტარის ვინაობას სავარაუდოდ 19 ან 20 ივლისს დაასახელებს.
ანი დვალიშვილი, ალია №23
კომენტარები