“საქართველო მორიგი პოლიტიკური რყევებისათვის ემზადება – ორ ოქტომბერს ქვეყანაში მუნიციპალური არჩევნები უნდა ჩატარდეს. სამშობლოში დაბრუნებას გეგმავს ექს-პრეზიდენტი მიხეილ სააკაშვილიც, რომელსაც ქართულმა სასამართლომ თავისუფლების აღკვეთის განაჩენი გამოუტანა სამსახურებრივი უფლებამოსილების გადაჭარბების გამო. ექს-პრეზიდენტს აშკარა იმედი აქვს, რომ ხელისუფლება, ოპოზიციის მასობრივი მხარდამჭერი გამოსვლების ფონზე, მის დაკავებას და საპყრობილეში გადაყვანას ვერ გაბედავს… და, აქედან გამომდინარე, საქართველოში „ვარდების რევოლუცია-2“ მოხდება”, – ასეთი შინაარსის სტატიას აქვეყნებს გაზეთი “კომერსანტი” სტატიას სათაურით – „მიხეილ სააკაშვილმა რევოლუციის მოახლოება იგრძნო? ექს-პრეზიდენტმა „კიევი-თბილისის“ ავიაბილეთი უკვე იყიდა და თბილისში ჩასვლას გეგმავს“.სამშობლოში დაბრუნების თარიღის გამოცხადების წინ სააკაშვილი ბრიუსელში ინტენსიურ მოლაპარაკებებს აწარმოებდა, ევროპელი პოლიტიკოსებისაგან, მათ შორის ევროპარლამენტის წევრებისაგან მხარდაჭერის მიღების მიზნით, მაგრამ როგორც განაცხადა „კომერსან“-თან საუბარში დეპუტატმა, ყოფილმა დიპლომატმა სალომე სამადაშვილმა, ძალიან საეჭვოა, რომ ექს-პრეზიდენტს რომელიმე ევროპელმა პოლიტიკოსმა მხარი პირდაპირ დაუჭიროს.
“ყოველ შემთხვევაში, მას თბილისში არავინ არ გამოყვება, თუმცა ვერც დაბრუნებას ვერ აუკრძალავენ“, – ამბობს სალომე სამადაშვილი. მან ასევე აღნიშნა, რომ „თუ მიხეილ სააკაშვილს საქართველოს ხელისუფლება დააპატიმრებს, დასავლეთი მას პოლიტპატიმრად გამოაცხადებს, თანაც ძალიან მაღალი რანგის პატიმრად“.
„კომერსანტის“ კორესპონდენტი ესაუბრება აგრეთვე პარლამენტის წევრს ხატია დეკანოიძეს, რომლის თქმით, მიხეილ სააკაშვილი სამშობლოში თანამემამულეთა ხმების დაცვის მიზნით ჩამოდის – ხელისუფლებას ოპოზიციისათვის გამარჯვების მოპარვა აქვს დაგეგმილი“.
ექს-პრეზიდენტს არა მხოლოდ მომხრეები, არამედ მოწინააღმდეგებიც ელოდებიან: გიორგი ხაინდრავამ, რომელიც მიხეილ სააკაშვილის წინააღმდეგ შექმნილი მოძრაობის ლიდერი იყო 2007-2012 წლებში, „კომერსანტ“-თან საუბრისას იმედი გამოხატა, რომ ექს-პრეზიდენტი დაუყონებლივ იქნება დაკავებული. ამასთან, იგი გაკვირვებულია უკრაინის ხელისუფლების მოქმედებით: „თუ უკრაინა თავს საქართველოს მეგობრულ სახელმწიფოდ თვლის, რატომ ჰყავთ მაშინ მთავრობაში ეს დამნაშავე?“, – რიტორიკული კითხვა დასვა გიორგი ხაინდრავამ.
ქართველი ექსპერტები ხელისუფლების მზადყოფნას ექს-პრეზიდენტის დაპატიმრების თაობაზე ერთგვარ „მოჩვენებით მოქმედებად“ თვლიან: „თუ მას მართლად დააპატიმრებენ, იგი უსახელურო ჩემოდნად გადაიქცევა და დასავლეთთან ურთიერთობის დაძაბვის ფაქტორად გადაიქცევა“, – ამბობს დავით ავალიშვილი, სააგენტო Nation-ის ანალიტიკოსი. ექსპერტი ხაზს უსვამს, რომ თბილისის სასამართლოს განაჩენს მიხეილ სააკაშვილის დაპატიმრების თაობაზე მსოფლიოს არცერთი სახელმწიფო არ არ ცნობს, რუსეთის გარდა: „ასე რომ არ ყოფილიყო, მას დასავლეთის ქვეყნებში გადაადგილების უფლება არ ექნებოდა“.
„კომერსანტ“-თან მოსაუბრემ არ გამორიცხა, რომ საქართველოს ხელისუფლება უკანასკნელ მომენტში უკრაინელ კოლეგებს სთხოვს, რომ კიევმა როგორმე ხელი შეუშალოს მიხეილ სააკაშვილის გამოფრენას თბილისში – ყველანაირი საბაბით, თუნდაც რეფორმებთან დაკავშირებით გაჩენილი სასწრაფო საკითხით.
ამრიგად, თუ ასე იმოქმედებენ, ყველა თავის სახეს შეინარჩუნებს: საქართველოს მთავრობა, უკრაინის პრეზიდენტის ადმინისტრაცია და თვითონ მიხეილ სააკაშვილი“.
კომენტარები