მოგვილოცეთ – კახა ბექაურმა საინფორმაციო ინტერნეტ-გამოცემას – „თაიმერი“ „ხელი ჩამოართვა“, პატივი დასდო და 30 მარტს თავის „წირვა-ლოცვაში“ „მოიხსენია“. როგორ? მარტივად! რატომ ? „უბრალოდ, ისე“. ეს ხუმრობით, რეალობა კი ასეთია: 2019 წლის 23 დეკემბერს კომუნიკაციების კომისიამ, რომელიც 2000 წლის 1 ივლისიდან მაუწყებლობისა და ელექტრონული კომუნიკაციების სფეროს მარეგულირებელი ორგანოა, გვამცნო, რომ შეიქმნა საზოგადოებასა და მედიას შორის გზამკვლევი – „მედიაკრიტიკა“ და „ჩა-გვიზუსტა: „MEDIACRITIK.GE ახალი ვებ-პლატფორმაა, რომელიც დღეიდან პროფესიულ და კვალიფიციურ, მიუკერძოებელ მედიაკრიტიკას შესთავაზებს საზოგადოებას.
მედიაკრიტიკის ონლაინ-პლატფორმის მიზანია ინფორმაციის კრიტიკული აღქმის და საბოლოო ჯამში, გააზრებული და ინფორმირებული არჩევანის ხელშეწყობა.
მედიაკრიტიკის პლატფორმა კომუნიკაციების კომისიის მედიააკადემიამ მედიაწიგნიერების განვითარების ხელშეწყობის მიზნით შექმნა. MEDIACRITIK.GE იქნება გზამკვლევი საზოგადოებას და მედიას შორის, იმავდროულად ონლაინ პლატფორმა ხელს შეუწყობს ჟურნალისტებისა და პროდიუსერების პროფესიულ განვითარებას».
სხვა თემაა, რამდენად მიუკერძოებელი შეიძლება იყოს კახა ბექაური, იმ ფონზე, როცა რამდენიმე წლის წინ, ბეჭდურმა მედიამ თავიდან ფეხებამდე „გააშიშვლა“ და ფაქტები დადო, როგორ „ჩაპარსა“ საზოგადოებრივი მაუწყებელი.
პრინციპში, იმხანად, მედია სისხლის სამართლებრივ დანაშაულზე, ადამიანების დევნაზე საუბარობდა, თუმცა, რაოდენ გასაკვირიც არ უნდა იყოს, ბექაურს სურვილი არ გასჩენია ყოფილი თანამშრომლების წინააღმდეგ სასამართლოსთვის მიემართა, ან ბრალდებებზე კვალიფიციური პასუხი გაეცა, ხოლო ჟურნალისტი ყალბი ახალი ამბის (Fake News) პროპაგანდისტად გამოეცხადებინა. ეს 2013 წელს, „ქართული ოცნების“ ხელისუფლებაში ყოფნის გარიჟრაჟზე მოხდა და ბექაური, სავარაუდოდ, მყარად ვერ იდგა „ქოცურ“ „მიწის ნაკვეთზე“, თორემ, როგორ შეიძლება არ ეპასუხა ბრალდებებზე, რომელმაც საბოლოოდ ბრაზილიური სერიალის სახე მიიღო და ბევრი შემაშფოთებელი ფაქტი გამოიტანა სამსჯავროზე.
სწორედ ამ „მოვლენების“ შემდეგ, უკვე ფეხზე მყარად მდგომი კახა ბექაური, გვამცნობს, რომ მისი სამსახურის მიერ შექმნილი ონლაინ პლატფორმა „ხელს შეუწყობს ჟურნალისტებისა და პროდიუსერების პროფესიულ განვითარებას“. მეტიც: „მედიაწიგნიერების განვითარების მიზნით, კომუნიკაციების კომისიამ დააფუძნა მედიაწიგნიერების დეპარტამენტი და მედიააკადემია, რომელიც მედიაკრიტიკის ვებ-პლატფორმის გარდა, კიდევ ორი ძირითადი მიმართულებით მუშაობს: მედია სკოლა – რომელიც მედია-მენეჯერებს, პროდიუსერებსა და ჟურნალისტებს კვალიფიკაციის ამაღლებაში ეხმარება და მედია ლაბი – ლაბორატორია, რომელიც მიზნად ისახავს ციფრულ მედიაში სტარტაპების მხარდაჭერას და დაფინანსებას“.
კრინტს არ დავძრავდით ჟურნალისტების პროფესიულ განვითარებაზე დამაშვრალი პლატფორმის შესახებ, რომ არა ერთი „უმნიშვნელო“ ფაქტი – ანფასში და პროფილში, მარჯვნივ და მარცხნივ, ზედხედით და წინხედით, ვერტიკალში და ჰორიზონტალურად პლატფორმა მხოლოდ იმ მედია-საშუალებებზე აკეთებს აქცენტს, რომელიც „მავანთ“ „თვალში არ მოსდით“.
თუ კახა ბექაური იტყვის, რომ ვცდებით, ვურჩევთ „ჩახედოს“ „მედიაკრიტიკის“ გვერდს თვალებში! იმედია, ბექაური უფრო „შორს არ წავა“ და საკუთარი მოსაზრების უფლებასაც არ წაგვართმევს, ისევე, როგორც სცადა მოპოვებული ინფორმაციის გავრცელება აგვიკრძალოს. მოდით, დავიწყოთ კი არა, გავაგრძელოთ კონსტიტუციით. „მუხლი 17. აზრის, ინფორმაციის, მასობრივი ინფორმაციის საშუალებათა და ინტერნეტის თავისუფლების უფლებები 2. ყოველ ადამიანს აქვს უფლება თავისუფლად მიიღოს და გაავრცელოს ინფორმაცია. 3. მასობრივი ინფორმაციის საშუალებები თავისუფალია. ცენზურა დაუშვებელია. სახელმწიფოს ან ცალკეულ პირებს არა აქვთ მასობრივი ინფორმაციის ან მისი გავრცელების საშუალებათა მონოპოლიზაციის უფლება“.
ესე იგი, ჩვენ გვაქვს მოპოვებული ინფორმაციის გავრცელების უფლება – ეს კონსტიტუციამ დაადგინა. კონსტიტუცია კი ქვეყნის უმაღლესი სამართლებრივი დოკუმენტია!
მოკლედ, სოციალურ ქსელში გავრცელდა ინფორმაცია, რომ 30 მარტს გიორგი გახარია სამეგრელოში პარტიის სექმნის შესახებ გააკეთებდა განცხადებას. „თაიმერმა“ სოციალურ ქსელში გავრცელებული ინფორმაციაზე დაყრდნობით, მოიძია ინფორმაცია. ჩვენ გავარკვიეთ, რომ გახარიას პარტიაში, სავარაუდოდ, ჩუგოშვილი და ხულორდავა იქნებოდნენ. კომენტარისთვის ორივე ქალბატონს დავუკავშირდით. ჩუგოშვილმა უარყო ჩვენს ხელთ არსებული ინფორმაცია, რაც ასახული იქნა გავრცელებულ ინფორმაციაში, ხულორდავამ სატელეფონო ზარზებს არ უპასუხა და ესეც მივუთითეთ. დეტალურად ჩვენს მიერ გავრცელებული ინფორმაცია შეგიძლიათ იხილოთ ბმულზე. რაკი რესპოდენტმა ჩვენს ხელთ არსებული ინფორმაცია არ დაადასტურა, გამოქვეყნებული ახალი ამბის სათაურში – გახარიას პარტიის სახეები ხულორდავა და ჩუგოშვილი იქნებიან?! – დავსვით კითხვის ნიშანი და ძახილის ნიშნით გამოვხატეთ ემოცია. იმედი გვაქვს, სხვათა აღზრდაზე პრეტენზიის მქონე „ბექაურმა და კომპანიმ“ იცის, რომ ძახილის ნიშანი, მხოლოდ ბრძანებით ფორმას არ გამოხატავს.
31 მარტს MEDIACRITIK.GE აქვეყნებს „დასკვნას“, სადაც „თაიმერის“ გარდა ჟურნალისტი Fake News-ის გამავრცელებელთა შორის მოხვდა, ხელისუფლების ერთ-ერთი შტოს მხარდამჭერი გამოცემაც. მოკლედ, კახა ბექაურმა გამოგვაცხადა „მთავარ დამნაშავედ“ – აი, გახარიამ არ გააკეთა განცხადება. ესე იგი, ბექაური, ეს ძალიან მაღალი კვალიფიკაციის თანამდებობის პირი, რომელსაც „გაკვრით“ და შეიძლება „სიღრმისეულადაც“ ჰქონდა შეხება ჟურნალისტიკასთან, თვლის, რომ გავრცელებული ინფორმაცია იმავე წამს უნდა დადასტურდეს, წინააღმდეგ, ინფორმაცია ყალბია. კი, ბატონო, იყოს ასე! მაშ, კონსტიტუციაში რატომ წერია – „ყოველ ადამიანს აქვს უფლება თავისუფლად მიიღოს და გაავრცელოს ინფორმაცია“. მითუმეტეს, „თაიმერს“ ბრალი არ დაუდია დანაშაულში არავისთვის. არის „ცხელი პერიოდი“, საზოგადოების დაკვეთაა ჰქონდეს ინფორმაცია, რა გადაწყვეტილებას მიიღებს გიორგი გახარია.
თამამად შეიძლება ითქვას, რომ ქართული პოლიტიკური „აურის“ ღერძი ახლა გახარიაა, პოზიცია და ოპოზიციაც მის გადაწყვეტილებას ელოდება და აი, უკვე მეოთხე დღეა, ვერა და ვერ მივხვდით რამ გააოცა კახა ბექაურის „კანტორა“ და რატომ გვიკრძალავს მოვიპოვოთ და გავავრცელოთ ინფორმაცია, ან საიდან იცის ბექაურმა, რომ ჩუგოშვილი და ხულორდავა ხვალ, ზეგ ან მაზეგ გახარიას პარტიაში არ იქნებიან? თუნდაც მოხდეს საპირისპირო და ეს ადამიანები არ აღმოჩნდნენ გახარიასთან, რა დააშავა ჩვენს მიერ გავრცელებულმა ინფორმაციამ, სამოქალაქო დაპირისპირება გამოიწვია თუ საერთაშორისო სკანდალი? ზოგადად, კი, რა გამოდის, ბექაურს თავისი MEDIACRITIK.GE-ით შეუძლია ექსპერტებსაც აუკრძალოს პროგნოზის გაკეთება, ან ვარაუდის გამოთქმა? ასე გამოდის არა? ვინმემ იცის რა უნდა ბექაურს?!
საინფორმაციო სააგენტო “თაიმერის” რედაქცია.
კომენტარები