“რუსული არმიის ნაწილები უკრაინულმა პოლიციამ დააკავა, დიახ, პოლიციამ დააკავა არმია” – 6 მაისის შეჯამება უკრაინაში

– სამი დღის წინ უკრაინული ოპერაცია ხარკივის შემოგარენში ინტენსიური გახდა ხოლო დღეს კი სრულმასშტაბიან შეტევაში გადაიზარდა. ჯერ კიდევ გუშინ იკვეთებოდა ამის კონტურები, მაგრამ დღეს უკრაინელები ყველა ფლანგიდან მიიწევენ წინ. როგორც კი უკრაინელებმა სტარი სალტივი აიღეს და მდინარეზე გადასასვლელი ხიდებიც გაამაგრეს აღმოსავლეთით დაიწყეს შემობრუნება და დარჩენილი რუსული ნაწილის გაწმენდა. მაგრამ ეს არ აღმოჩნდა ნელი პროცესი, არამედ ხარკივიდან დაიძრა უკრაინული ორი ბრიგადა, სპეციალური რაზმები, “კრაკენისა” და “აზოვის” ნაწილები და სხვა. მაგრამ საინტერესო რამ მოხდა დღეს – რუსული არმიის ნაწილები სტარი სალტივსა და ფრედორივკას შორის ადგილობრივმა პოლიციამ დააკავა. დიახ, პოლიციამ დააკავა არმია. რა თქმა უნდა, პოლიციური რაზმები აგრესიის მოგერიებაში სრულად არიან ჩაბმულები და კარგადაც აღჭურვილნი, მაგრამ ხარკივის შემოგარენში მომხდარი ამბავი მხოლოდ იმაზე მიუთითებს, რომ რუსული არმია კატასტროფულადაა გამოფიტული და რეალურად ბრძოლის თავიც აღარ აქვს.

ამასთან, უკრაინელებმა დაიწყეს დასავლური თვითმკვლელი დრონების – “სვიჩბლეიდებისა” და “ფენიქსის მოჩვენებების” გამოყენება. რუსული ყველაზე კარგად გამაგრებული და დაშორებული პოზიციებიც კი აღარ არის დაცული. ხარკივის რაიონში მათი წარმატებული გამოყენების შემდეგ ალბათ მალე თვითმკვლელ დრონებს მთელს აღმოსავლეთ უკრაინაში ვიხილავთ კიდეც.

უკრაინელთა სწრაფი წინსვლის ფონზე ბელგოროდის რაიონში (რუსეთში), ხარკივის სასაზღვრო ზონაში რუსები გარკვეულ თავდაცვის ზღუდეებსაც კი აკეთებენ. პოტენციური უკრაინული შეტევის შიშის გამო.

– ხარკივის რაიონში, იზუმის მიმართულებით რუსების შეტევა სრულადაა შეჩერებული. მეტიც, როგორც ჩანს რუსები დიდი დანაკარგების გამო იზუმის გავლით დონეცკის უკრაინული დაჯგუფების ალყაში მოქცევას ვეღარ განახორციელებენ და ფოკუსი ისევ ლუგანსკის რაიონის დარჩენილი დასახლებების დაკავებაზე გადაიტანეს. შესაძლოა იზუმიდან მოიხსნას კიდეც გარკვეული რაოდენობით რუსული ნაწილები და გადაისროლონ ლუგანსკში. დღეს შეტაკებები სწორედ ამ რაიონში მიმდინარეობდა. სევეროდონეცკი მთავარ საბრძოლო არეალადაა ქცეული.

– ქალაქ დონეცკთან ავდიივკაზე რუსებმა შეტევა ვერ განახორციელეს. სამაგიეროდ უკრაინელებმა კონტრშეტევა სცადეს 2014 წელს ოკუპირებულ იასინუვატაზე, რომელიც ავდიივკას მომიჯნავედაა. რუსებს დიდი დანაკარგები აქვთ. თუმცა როგორც ჩანს ვერც უკრაინელები და ვერც რუსები გარდამტეხი უპირატესობის მოპოვებას ჯერ კიდევ ვერ ახერხებენ.

– აზოვსტალში სიტუაცია ძალიან მძიმეა. დაჭრილებს არ აქვთ წამლები და ანტიბიოტიკები. შესაბამისად ნებისმიერი ჭრილობა ხშირ შემთხვევაში იწვევს გართულებებს და ხდება ფატალური. ასობით დაჭრილია ქარხნის ტერიტორიაზე, რაც ქალაქის მცველების მდგომარეობას კიდევ უფრო რთულად აქცევს. მიუხედავად იმისა, რომ რუსების ცოცხალი ძალის მნიშვნელოვანმა ნაწილმა უკვე დატოვა მარიუპოლი და ფრონტის სხვა მიმართულებით დეფიციტის გამო მათი გადასროლა მოხდა, მაინც, იმდენი სამხედრო დარჩა თავიანთი მძიმე ტექნიკითურთ, რომ აზოვსტალის იერიში ყოველდღიურად გრძელდება. მიუხედავად ამისა, ქარხნის ზედა და ქვედა ნაწილი კვლავ უკრაინელთა ხელშია.

– რუსული სამხედრო კოლონა შემჩნეული იქნა ბელორუსში, ქალაქ პინსკთან ახლოს, რომელიც დასავლეთ უკრაინას, კერძოდ ვოლინისა და რივნეს მხარეებს ესაზღვრება. რუსებს სამხედრო ძალების დეფიციტი აქვთ და თუკი რუსეთის ხელისუფლება ბელორუსში დარჩენილ რუსულ ნაწილებს არ ეზიდება უკან, მაშინ ეს შეიძლება მიანიშნებდეს დასავლეთ უკრაინაზე რაიმე ფორმით იერიშის წამოწყების მცდელობას. რთული სათქმელია ზუსტად რა გეგმა აქვს რუსეთს, მაგრამ სამხედრო-პოლიტიკური მდგომარეობის გასაუმჯობესებლად ყველაფერი შეიძლება ვიხილოთ.

– ჯერჯერობით უცნობია რა ხდება რუსული საზღვაო ფრეგატის ადმირალი “მაკაროვის” თავს. შესაძლოა მას მართლაც მოხვდა უკრაინული “ნეპტუნის” ტიპის რაკეტა და ახლა იძირება კიდეც. მაგრამ ჯერჯერობით რთულია რაიმეს დადასტურება ან უარყოფა. თუმცა უკვე რეალობაა, რომ რუსული შავის ზღვის ფლოტი დიდ კრიზისშია.”