რუსეთის პრეზიდენტის პრესმდივანმა, პესკოვმა განმარტა თავისივე განცხადება რუსეთის “მნიშვნელოვანი დანაკარგების” შესახებ და თქვა, რომ უკრაინაში სპეცოპერაციის დროს რუსული არმიის მნიშვნელოვან დანაკარგებზე საუბრისას, იგი ეყრდნობოდა თავდაცვის სამინისტროს მონაცემებს 1351 დაღუპული ჯარისკაცის შესახებ.
„ჩვენ გვაქვს მხოლოდ თავდაცვის სამინისტროს მიერ გამოქვეყნებული ციფრები. ეს მნიშვნელოვანი მაჩვენებელია, ”- ასე უპასუხა პესკოვმა კითხვას, ეყრდნობოდა თუ არა თავდაცვის სამინისტროს ბოლო გამოქვეყნებულ მონაცემებს დანაკარგების შესახებ, როდესაც, ერთი დღით ადრე Sky News-თან ინტერვიუში ამბობდა, რომ რუსეთის დანაკარგები უკრაინაში სპეცოპერაციის დროს მნიშვნელოვანი იყო. ინტერვიუს დროს, მან ასევე აღნიშნა, რომ რუსეთის ხელისუფლება იმედოვნებს, რომ “სპეცოპერაციას” უახლოეს მომავალში დაასრულებს, ან სამხედრო საშუალებებით დასახული მიზნების მიღწევით, ან მშვიდობიანი მოლაპარაკებების გზით.
პარალელურად, პესკოვი გააკრიტიკა არაერთმა რუსმა დეპუტატმა და ისინი ამბობდნენ, რომ პესკოვის განცხადება რუსული ჯარის დანაკარგებზე კითხვის ნიშნებს ტოვებს, ისინი კითხულობდნენ, რას ნიშნავს დიდი დანაკარგი.
შეგახსენებთ, რუსეთის თავდაცვის სამინისტრომ ორჯერ გამოაქვეყნა მონაცემები სამხედრო სპეცოპერაციის დროს რუსული ჯარების დანაკარგების შესახებ – 2 მარტს და 25 მარტს. ბოლო მონაცემებით, უკრაინაში ჩატარებული ოპერაციის დროს 1351 რუსი სამხედრო დაიღუპა და 3825 დაშავდა.
უკრაინის თავდაცვის სამინისტროს ბოლოს მონაცემით კი, უკრაინაში 19 000–მდე რუსი ჯარისკაცია უკვე დაღუპული.
შეგახსენებთ იმასაც, რომ ომის დაწყებიდან ორი კვირის მანძილზე, მაშინ, როცა უკრაინული მხარე ითხოვდა წითელი ჯვრის დახმარებას, რუსი ჯარისკაცების ცხედრების გადასასვენებლად რუსეთში, რუსეთი უარჰყოფდა, რომ საერთოდ ჰყავდა დაღუპული ჯარისკაცი. იგი უარჰყოფდა იმასაც, რომ წინა ხაზზე უშვებდა წვევამდელებს, სანამ უკრაინიდან არაერთი ტყვედჩავარნილი წვევამდელის ინტერვიუ არ გავრცელდა.
კომენტარები