უკრაინის პრეზიდენტის, ვოლოდიმირ ზელენსკის მიმართვა გავრცელდა, სადაც ამბობს, რომ თებერვალში სრულმასშტაბიანი შეჭრის შემდეგ უკრაინაში 31 000-ზე მეტი რუსი ჯარისკაცი დაიღუპა.
ზელენსკის სიტყვებით, ომი რუსეთის შეიარაღებულ ძალებს “დღეში 300 სიცოცხლე უჯდებათ” და მალე მიაღწევენ იმ ნიშნულს, რომელიც მოსკოვისთვის მიუღებელი იქნება.
ზელენსკი ამბობს, რომ ბოლო 24 საათის განმავლობაში ფრონტებზე სიტუაცია მნიშვნელოვნად არ შეცვლილა.
“დონბასის აბსოლუტურად გმირული დაცვა გრძელდება. ცხელი წერტილები იგივე რჩება – პირველ რიგში, სევეროდონეცკი, ლისიჩანსკი და პოპასნაია. ოკუპანტებს არ სჯეროდათ, რომ ჩვენი არმიის გამძლეობა ასეთი მყარი იქნებოდა. ახლა ისინი ცდილობენ, რომ ახალი რესურსები მიიღონ დონბასიდან. იგივე ხდება ხერსონშიც – მათ ახალი დანაყოფები მოჰყავთ, რათა ჩვენი ქმედებები ჩაახშონ.
31 000 რუს ჯარისკაცზე მეტი დაიღუპა უკრაინაში. უკრაინის წინააღმდეგ აბსოლუტურად უაზრო ომის საფასურს რუსეთი დღეში თითქმის 300 სიცოცხლით იხდის. მოვა დღე, როდესაც დაღუპულთა რიცხვი მიაღწევს რუსეთისთვის მიუღებელ ნიშნულს. ოკუპანტების კონტინგენტის უდიდესმა ნაწილმა შესანიშნავად გააცნობიერა, რომ მათ უკრაინაში არანაირი პერსპექტივა არ აქვთ. […] ჩვენ თავისუფალი ადამიანები ვართ, არა თქვენი მონები”. – ამბობს ვოლოდიმირ ზელენსკი მიმართვაში.
კომენტარები