“რუსეთზე ასეთი საუბარი ჩვენი შეურაცხყოფაა – რუსეთმა დახოცა ჩვენი ოჯახის წევრები” – ანწუხელიძის ოჯახის პასუხი

გიორგი ანწუხელიძის ოჯახის პასუხი სკანდალში გახვეულ გორის საკრებულოს თავმჯდომარეს, დავით რაზმაძეს:

“რუსებთან დაკავშირებით ჩემი აზრი ყველამ კარგად იცის. არაერთხელ მითქვამ და 8 აგვისტოსაც ვთქვი, რომ ომი დაიწყო რუსეთმა და რუსეთმა დახოცა სწორედ ჩვენი ოჯახის წევრები. გორშიც ყველამ კარგად იცოდა, რაც ხდებოდა და რეებსაც აკეთებდნენ რუსი ოკუპანტები. ამდენს თუ ვერ ხვდება ხალხი, არვიცი, რაღა ვთქვა. რუსეთთან დაკავშირებით ასეთი საუბარი ყოველთვის ჩვენი შეურაცხყოფაა. მარტო ჩემი არა და ანწუხელიძის, ყველასი. იქ ხომ ამდენი ქართველი ჯარისკაცი დაიღუპა. ეს ყველას ოჯახის შეურაცხყოფაა. გიორგი დღეს რომ ცოცხალი იყოს, იგივეს იფიქრებდა ჩემსავით”, – აცხადებს ანწუხელიძის მეუღლე.  

ცნობისთვის, New York Times- მა ვრცელი სტატია გამოაქვეყა სათაურით – “როგორ გადავიდა საქართველო დემოკრატიის ავანგარდიდან ავტოკრატიის ფრონტის წინა ხაზზე”.

[რუსები] აქ მშვიდობისმყოფელებად მოვიდნენ და მადლობა ღმერთს, რომ ასე მოიქცნენ, რადგან მიშას ხულიგნები მთელ ქალაქს ძარცვავდნენ. მათ მღვდლის მანქანაც კი მოიპარეს, წარმოგიდგენიათ? რუსები რომ არ მოსულიყვნენ, ვინ იცის, კიდევ რამხელა ზიანს გამოიწვევდნენ… ეს ყველაფერი მიშას ბრალი იყო, შეგნებულად წავიდა პროვოკაციაზე…” – განაცხადა გორის საკრებულოს თავმჯდომარემ New York Times-თან.

თარგმანი – ნეტგაზეთი

გამოცემა წერს, რომ 90-წუთიანი ინტერვიუს დროს რაზმაძემ მოახერხა მიხეილ სააკაშვილის დადანაშაულება ყველაფერში – ეკლესიაში მრევლის შემცირებიდან დაწყებული მუნიციპალური შადრევნების ხარჯების გადაჭარბებით დამთავრებული.

დავით რაზმაძე კი წერს, რომ ცნობილმა გამოცემამ ინტერვიუ გაუყალბა.