რუსეთს უკრაინაში ჯერ სერიოზულად არაფერი დაუწყია, – ამის შესახებ სახელმწიფო დუმის ფრაქციების ლიდერებთან შეხვედრაზე რუსეთის პრეზიდენტმა ვლადიმერ პუტინმა განაცხადა.
„ყველამ უნდა იცოდეს, რომ ჩვენ სერიოზულად ჯერ არაფერი დაგვიწყია…
თუ დასავლეთს კონფლიქტის პროვოცირება სურდა, რომ რუსეთთან ბრძოლის ახალ ეტაპზე, ჩვენი ქვეყნის შეკავების ახალ ეტაპზე გადასულიყო, შეიძლება ითქვას, რომ ეს გარკვეულწილად შეძლეს. ნორმალურ პირობებში, ალბათ, ამის გაკეთება რთული იქნებოდა. თუმცა, რას მინდა, მივაქციო ყურადღება – მათ უნდა გააცნობიერონ, რომ წააგეს ჩვენი სპეციალური სამხედრო ოპერაციის დაწყებისთანავე, რადგან მისი დაწყება ნიშნავს ამერიკული მსოფლიო წესრიგის კარდინალურ გარდატეხას. ეს ნიშნავდა ლიბერალურ-გლობალისტური ამერიკული ეგოცენტრიზმიდან ნამდვილად მრავალპოლარულ მსოფლიოზე გადასვლას… დღეს ჩვენ გვესმის, რომ ჩვენი დამარცხება ბრძოლის ველზე სურთ. რა ვთქვათ აქ – სცადონ. ჩვენ არაერთხელ მოვისმინეთ, რომ დასავლეთს ჩვენთან ომი სურს უკანასკნელ უკრაინელამდე. ეს არის ტრაგედია უკრაინელი ხალხისთვის, თუმცა როგორც ჩანს, ყველაფერი ამისკენ მიდის.
ჩვენ უარს არ ვამბობთ მშვიდობიან მოლაპარაკებებზე, თუმცა მათ, ვინც უარს ამბობენ, უნდა იცოდნენ, რომ რაც უფრო შორს წავლენ, მით უფრო რთული იქნება ჩვენთან შეთანხმება.
„ე.წ. კოლექტიური დასავლეთი აშშ-ის ხელმძღვანელობით ათწლეულების განმავლობაში რუსეთთან მიმართებით მხოლოდ აგრესიულად იქცევა. ჩვენი შეთავაზებები ევროპაში უსაფრთხოების თანაბარი სისტემის შექმნის შესახებ უკუგდებულია. რაკეტსაწინააღმდეგო თავდაცვის პრობლემაზე ერთობლივი მუშაობის ინიციატივები უარყოფილია. გაფრთხილებები ნატო-ს გაფართოების მიუღებლობის შესახებ, განსაკუთრებით საბჭოთა კავშირი ყოფილი რესპუბლიკების ხარჯზე, უგულებელყოფილია“.
წყარო – საზოგადოებრივი არხი
შეგახსენებთ, პუტინი დღემდე ამტკიცებს, რომ უკრაინაში ომი კი არა, სამხედრო ოპერაციაა, ისევე, როგორც ომის დაწყების პირველ დღეებში ამტკიცებდა, რომ არც ერთი რუსი ჯარისკაცი არ გარდაცვლილა, ასევე ამტკიცებდა, რომ არც ერთი წვევამდელი არ ჰყავს გაგზავნილი უკრაინაში საომრად – რუსეთმა 8 მარტს გამოაქვეყნა ვიდეო, სადაც პუტინი რუს დედებს უმტკიცებდა, რომ წვევამდელები უკრანასთან ომში არ მონაწილეობდნენ, თუმცა, მეორე დღესვე, პუტინის მთავრობამ აღიარა, რომ უკრაინაში წვევამდელები მართლაც ჰყავდათ გაგზავნილნი.
კომენტარები