თავდაცვის მინისტრმა, ირაკლი ღარიბაშვილმა განაცხადა, რომ მისთვის დავით ხიდაშელის, კარტოგრაფების საქმის ერთ-ერთი ფიგურანტის ქმედება გმირობის ტოლფასია და ის მადლობას იმსახურებს.
“მე ვფიქრობ, რომ ნებისმიერ ნორმალურ სახელმწიფოში ასეთი სპეცოპერაციის დამგეგმავი, ინიციატორი და შემსრულებლები, როგორც მინიმუმ, მადლობას იმსახურებენ. ჩემთვის ბატონი დავითის ქმედება, რა თქმა უნდა, გმირობის ტოლფასია და მადლობა ეკუთვნის ამ ადამიანს იმ დიდი პატრიოტული საქმისთვის, რაც მან გააკეთა”, — განაცხადა ღარიბაშვილმა იმედის ეთერში.
ღარიბაშვილის თქმით, რუკა 3 აპრილს ჩამოვიდა რუსეთის არქივიდან.
“3 აპრილს ჩვენ ჩამოგვდის რუკა, ორიგინალი რუსეთის არქივიდან ამოღებული, გამოტანილი. დაარქვით სპეცოპერაცია, რაც გინდათ, ის დაარქვით. რეალურად, ოკუპანტი ქვეყნიდან გამოვიტანეთ ეს რუკა და არამარტო ეს რუკა. მე არ მაქვს უფლება, რომ კიდევ უფრო სხვა უფრო მნიშვნელოვანი ინფორმაცია, რომელიც გვაქვს”, — თქვა თავდაცვის მინისტრმა.
დავით ხიდაშელი კარტოგრაფების საქმის ერთ-ერთი ფიგურანტია. საქმის მასალების მიხედვით, ხიდაშელმა ჩამოიტანა 1938 წელს გამოცემული 1:200 000 მასშტაბის რუკა. მისი თქმით, რუკა რუსეთის არქივებიდან აქვს.
ხიდაშელის ჩვენების თანახმად, რუკის მოსაძებნად მას მისმა მეგობარმა, ბეჟან მაისურაძემ მიმართა. თუმცა 13 ოქტომბერს რუსთავი 2-ის ეთერში მან განაცხადა, რომ დახმარებისთვის მას ქართული ოცნების თავმჯდომარემ, ბიძინა ივანიშვილმა დაურეკა.
კომენტარები