“რუსეთი წაახალისა იმან, რომ ვერ შევძელით პუტინისთვის საფასურის გადახდა გვეიძულებინა” – პანეტა

ბარაკ ობამას ადმინისტრაციის თავდაცვის მდივანმა ლეონ პანეტამ პოლიტმეტრის ეთერში, განაცხადა:

“პუტინი მოძალადეა და ის ძალის გამოყენებით მოქმედებს. მისთვის გასაგები ერთადერთი ენა მის წინააღმდეგ ძალის გამოყენებაა. აქედან გამომდინარე, იქნებოდა ეს ყირიმში შეჭრა, სირიასა თუ ლიბიაში შეჭრა, თუნდაც ნებისმიერი ადგილი, სადაც კიბერშეტევებს ახორციელებდა, რუსეთს მსგავსი საქციელისთვის საფასური უნდა გადაეხადა და იმან, რომ ჩვენ ვერ შევძელით, პუტინისთვის საფასურის გადახდა გვეიძულებინა, წაახალისა და რუსეთს საშუალება მისცა, ისეთი სახის ქმედება განეხორციელებინა, როგორც უკრაინაში შეჭრაა. ახლა კი ნამდვილად მჯერა, რომ მსოფლიო გაერთიანებულია. აშშ და მისი მოკავშირეები ძალიან მკვეთრად არიან გაერთიანებული რუსეთის აგრესიის წინააღმდეგ, ვფიქრობ, ეს არის ძალიან მნიშვნელოვანი სიგნალი, რომელიც გაგზავნილია არამხოლოდ რუსეთისთვის, არამედ ჩინეთისთვისაც, ჩრდილოეთ კორეისთვის და ირანისთვისაც.

ვფიქრობ, ძალიან მნიშვნელოვანი იყო შეერთებული შტატებისა და ნატოს მოკავშირეებისთვის, რომ გაერთიანებულიყვნენ და პუტინისთვის ძალიან ნათელი სიგნალი გაეგზავნათ – რომ თუ ნამდვილად შეიჭრებოდა, მას ამის გამო საფასურის გადახდა მოუწევდა. სამწუხაროდ პუტინმა აშშ-ის მხრიდან წლების განმავლობაში გამოჩენილი სისუსტე იგრძნო, ამით ისარგებლა მაშინ, როდესაც შეიჭრა საქართველოში, ყირიმში, ასევე სირიასა და ლიბიაში, და მაშინ როდესაც არჩევნების დროს შეერთებული შტატების წინააღმდეგ ძალიან გამბედავი კიბერშეტევა განახორციელა. მას ამის საზღაური არ გადაუხდია. ის ფიქრობდა, რომ ეს შეჭრაც ასე ჩაივლიდა და პასუხს არავინ მოსთხოვდა. ვფიქრობ, ძალიან მნიშვნელოვანი იყო, რომ შეერთებულ შტატებსა და ჩვენს მოკავშირეებს ძალიან ცხადად ეთქვათ, რომ მას ფასის გადახდა მოუწევდათ, რაც გამოიხატა სანქციების დაკისრებაში, ასევე უკრაინისთვის იარაღის სახით გაწეულ დახმარებაში.”