“რუსებმა “ლანცეტების” გამოყენება გაზარდეს, რაც ჩიპებისა დეფიციტის ფონზე მოულოდნელი იყო” – კობერიძე

საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:

16 ნოემბრის შეჯამება უკრაინაში:

– იტალიის პრემიერმა ჯორჯა მელონიმ ყველაზე ადეკვატურად შეაფასა პოლონეთ-უკრაინის საზღვართან მომხდარი სარაკეტო ინციდენტი და აღნიშნა, რომ უკანონო ომში მშვიდობიანი ქალაქების წინააღმდეგ ნასროლი რუსული რაკეტის გასროლას მოჰყვა ორი პოლონელი ფერმერის მკვლელობა. თუნდაც ეს უკრაინის ჰაერსაწინააღმდეგო სისტემის მუშაობის შემდეგ მომხდარიყო პასუხისმგებლობა მაინც რუსეთს ეკისრება ვინც რაკეტა გაისროლაო. თუმცა მელონის გაცხადების მიღმა საინტერესოა აშშ-ს სამხედრო ექსპერტებისა და გენერალი ჯერ კინის შეფასება – მან აღნიშნა, რომ რუსული რაკეტები იმდენად ხშირად ცდება მიზანს რომ ესეც ერთ-ერთი შემთხვევა ყოფილიყო არ არის გამორიცხულიო.

როგორც არ უნდა იყოს, რუსეთისათვის დასავლეთის რეაქცია და შემდგომ საქმით დამდგარი შედეგი მნიშვნელოვანი ინდიკატორი იქნება მოქმედების თავისუფლებასთან დაკავშირებით. სავარაუდოა, რომ დასავლეთის მხრიდან განცხადებების დონეზე გამწვავება აღარ მოხდება მაგრამ უკრაინისათვის სამხედრო დახმარების თვალსაზრისით მდგომარეობა გაუმჯობესდება.

ამ ფონზე შვედეთის ახალი (მემარჯვენე) მთავრობის მხრიდან 300 მილიონი დოლარის სამხედრო დახმარების პაკეტი მიეწოდება უკრაინას.

– დღეის მდგომარეობით საბრძოლო მოქმედებების ძირითადი ცენტრი აღმოსავლეთი უკრაინაა. რუსები აქტიურობენ დონეცკის რაიონში – პავლივკას დიდი ნაწილი დაიკავეს და დანარჩენის აღებასაც ცდილობენ რის შემთხვევაშიც შეტევის მიმართულება უჰლედარი იქნება.

რუსებმა უჰლედარიდან დასავლეთით მდებარე დასახლებებზეც სცადეს იერიშები, მათ შორის ველიკა ნოვოსილკაზე, რომელსაც წარსულშიც არაერთხელ შეუტიეს, მაგრამ ამჯერადაც ვერ მიაღწიეს წარმატებას.

ბახმუტი და ავდიივკა კვლავ გადაულახავ ამოცანადაა ქცეული რუსული არმიისათვის. ყოველდღიური მსხვერპლი იზრდება მაგრამ წარმატების მიღწევას ვერ ახერხებენ. ბახმუტიცა და ავდიივკაც მტკიცედ დგას უკრაინელთა ხელში.

– რუსული თვითგანადგურებადი დრონები “ლანცეტები” ბოლო დღეები შედარებით აქტიურობენ უკრაინული ტექნიკის წინააღმდეგ. თუკი ირანული დრონებით სამოქალაქო ინფრასტრუქტურა ნადგურდება “ლანცეტებს” ძირითადად სამხედრო ძალების წინააღმდეგ იყენებს რუსეთი. მიუხედავად რუსული პროპაგანდისა უკრაინელთა რიგებში “ლანცეტით” მიყენებული ზარალი ჯერჯერობით მაინც არაა დიდი, მაგრამ პრობლემა ისაა, რომ რუსებმა მისი გამოყენება გაზარდეს, რაც ჩიპებისა და ტექნოლოგიების დეფიციტის ფონზე მოულოდნელი იყო. თუმცა ამ ეტაპზე “ლანცეტებს” ომში რაიმე გარდატეხის შეტანა არ შეუძლიათ.

– უკრაინელები უკვე კრემინა-სვატოვეს გზის გასწვრივ არიან განლაგებულები და ბრძოლა გზის მომიჯნავედ მიმდინარეობს. გზა არამხოლოდ არტილერიის მიერაა ცეცხლის ქვეშ მოქცეული, არამედ უკრაინელი ქვეითებიც მის გასწვრივ იმყოფებიან. სავარაუდოა, რომ მხოლოდ დღეების ამბავია ამ გზის გადაკეტვა და შემდგომ უკრაინული მცდელობა მოაქციონ კრემინა რკალისებრ ალყაში ხოლო სვატოვეზე ორი მიმართულებიდან დაიწყონ შეტევა. რუსებმა ეს კარგად იციან და ერთის მხრივ ამაგრებენ ორივე ქალაქს ხოლო მეორეს მხრივ კოლაბორაციონისტების ევაკუაციას გეგმავენ.