რუმინეთში საქართველოს ელჩად დაინიშნა, წინა ორი ხელისუფლების ყოფილი მაღალჩინოსანი

თამარ ბერუჩაშვილი რუმინეთში საქართველოს ელჩად დაინიშნა. ამის შესახებ ინფორმაციას მთავრობის ადმინისტრაცია ავრცელებს.

მათივე ცნობით, თამარ ბერუჩაშვილს მთავრობის ადმინისტრაციაში პრემიერ-მინისტრი ირაკლი ღარიბაშვილი შეხვდა და მომავალ საქმიანობაში წარმატებები უსურვა.

თამარ ბერუჩაშვილი სხვადასხვა დროს იკავებდა საქართველოს საგარეო საქმეთა მინისტრისა და მინისტრის მოადგილის პოზიციებს, წინა ორი ხელისუფლების დროს და ამ ხელისუფლების პირობებშიც, მაგალითად:

2000-2003 წწ. საქართველოს საგარეო საქმეთა მინისტრის მოადგილეა;

2003-2004 წწ. სახელმწიფო მინისტრის მოადგილე, საქართველოს სახელმწიფო კანცელარია;

2004-2004 წწ. სახელმწიფო მინისტრი ევროპულ სტრუქტურებში ინტეგრაციის საკითხებში;

2004-2011 წწ. ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის პირველი მოადგილე;

01/2011-10/2012 წწ. ვიცე-პრემიერის, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის მთავარი მრჩეველი; (ვანო მერაბიშვილის პრემიერობის პერიოდი – (4 ივლისი, 2012 – 25 ოქტომბერი, 2012)

2012-2013 წწ. ევროპულ და ევროატლანტიკური ინტეგრაციის საკითხებში სახელმწიფო მინისტრის მოადგილე;

2013 – 2014 წწ. – საქართველოს საგარეო საქმეთა მინისტრის მოადგილე;

2014–2015 წ.წ. – საქართველოს საგარეო საქმეთა მინისტრი.

რაც შეეხება განათლებას:

1978-1985 წლებში სწავლობდა მოსკოვის პ. ლუმუმბას სახელობის ხალხთა მეგობრობის უნივერსიტეტში, ფიზიკა-მათემატიკისა და საბუნებისმეტყველო მეცნიერებათა ფაკულტეტზე. ასევე უცხო ენათა ფაკულტეტზე (ფრანგული ენა). კვალიფიკაცია — ქიმიკოსი — მკვლევარი, საშუალო და უმაღლესი სასწავლებლის პედაგოგი, თარჯიმანი.

1992-1993 წლებში სწავლობდა ლიმერიკის უნივერსიტეტში (ლიმერიკი, ირლანდია). პროფესიონალური ტრენინგი — ევროპათმცოდნეობა და ინგლისური ენა.

1996-1998 წლებში სწავლობდა აშშ-ში, ბლუმინგტონში, ინდიანის სახელმწიფო უნივერსიტეტში, საერთაშორისო და შედარებითი ურთიერთობების ფაკულტეტზე. 1998 წელს მიიღო საჯარო ადმინისტრირების მაგისტრის ხარისხი (MPA).

2002-2006 წლებში სწავლობდა ივანე ჯავახიშვილის სახელობის თბილისის სახელმწიფო უნივერსიტეტში, ეკონომიკის ფაკულტეტზე, ასპირანტურა. კვალიფიკაცია — ეკონომიკის დოქტორი.

საგარეო საქმეთა მინისტრობის დროს, თამარ ბერუჩაშვილმა ჟურნალისტებს განუცხადა, რომ ოფიციალური თბილისი არ აპირებს, მიხეილ სააკაშვილის ოდესის ადმინისტრაციის უფროსად დანიშვნის გამო უკრაინას საპროტესტო ნოტა გაუგზავნოს.