„ალიას“ კითხვებს პასუხობს სოსო გოგაშვილი, სუს-ის ყოფილი მაღალჩინოსანი, რომელმაც გასულ შაბათს, “ტვ პირველის” ეთერში ვრცლად ისაუბრა ციანიდის საქმეზე, თუმცა, კითხვაზე, ხომ არ არის მეუფე შიო რუსული პროექტი, მისი მხოლოდ ერთწინადადებიანი პასუხი გავიდა ეთერში, რამაც საზოგადოების ნაწილში კითხვები გააჩინა.
– და მაინც, არის თუ არა მეუფე შიო, რუსული პროექტი? საკმაოდ მოკლე იყო ამასთან დაკავშირებით თქვენი პასუხი, რამაც გარკვეული ეჭვები გააჩინა.
– დასმული იყო კითხვა, ხომ არ იყო მეუფე შიო რუსული პროექტი? – და ეთერში გავიდა ჩემი პასუხი ერთი წინადადებით, რომ მე არა მაქვს ამის დამადასტურებელი დოკუმენტი. მელაძესთან ინტერვიუს დროსაც (რომელიც რეალურად თითქმის 3 საათი გაგრძლდა) ვთქვი და ახლაც ვიმეორებ – ჩემ სამსახურს არ ჰქონდა რამე ტიპის დამადასტურებელი დოკუმენტაცია იმასთან დაკავშირებით, რომ მეუფე შიოს შეიძლება რუსულ სპეცსამსახურებთან ჰქონდეს კავშირი და სწორედ ამიტომ არა მაქვს არანაირი საბაბი ვიფიქრო, რომ ის რუსული პროექტია. არც ერთი დოკუმენტი, არც ერთი ოპერატიული ინფორმაცია ამასთან დაკავშირებით არ ყოფილა.
– არც ერთი დოკუმენტი არ ყოფილაო და შესწავლილი გაქვთ?
– ბუნებრივია, ასეთი კავშირები როცა არსებობს, ყოველთვის იკვეთება. გამორიცხულია, რომ არ გამოჩნდეს. შესაბამისად, რაკი არ მინახავს მსგავსი დოკუმენტი, ამიტომ შემიძლია ასე თამამად იმის თქმა, რომ არ არის რუსული პროექტი. მელაძემ ინტერვიუს დროს მაჩვენა ორი პირის ფოტოსურათი, რომლების რუსეთიდან ჩამოვიდნენ, როგორც მოგვიანებით გავიგეთ, მღვდელმთავრების რეიტინგის შესასწავლად, რათა დაედგინათ, ვინ შეიძლებოდა ყოფილიყო პატრიარქობის კანდიდატი, ასე ვთქვათ და მელაძემ მკითხა, ხომ არ იყო დროში თანხვედრაში მღვდელმთავრების რეიტინგის დადგენა მეუფე შიოს მოსაყდრედ დასახელებასთან. ვერ გავიხსენე ქრონოლოგიურად მაშინ, როგორ იყო და ვთქვი კიდეც, არ მახსოვს-თქო, ინტერვიუს შემდეგ გადავამოწმე და მეუფე შიო უკვე მოსაყდრე იყო, როცა ის ორი პირი ჩამოვიდა. დროში თანხვედრაში ეს დეტალიც არ აღმოჩნდა.
– თუმცა, თქვენ მელაძეს იმაში დაეთანხმეთ, რომ შესაძლოა, პატრიარქმა სწორედ იმიტომ დაიყენა მოსაყდრედ მეუფე შიო და სწორედ იმიტომ დაიყენა იმ ფორმით, რა ფორმითაც ეს მოხდა, რომ მისკენ მიმართული შეთქმულებები შეეჩერებინა…
– ეგრე არ მითქვამს, თავად დასვა კითხვა ასე, ვუპასუხე და თქვენც იგივეს გეტყვით, პატრიარქის ნებისმიერი მოქმედება ყოველთვის იყო და არის მიმართული ეკლესიის სიძლიერისა და სიმტკიცისთვის. არასოდეს გადაუდგამს პატრიარქს ისეთი ნაბიჯი, რომელიც სახელმწიფოს და ეკლესიას დააზიანებდა.
– რომ გქონოდათ რამე ტიპის სამხილი მეუფე შიოს წინააღმდეგ, იტყოდით?
– რა თქმა უნდა, აუცილებლად ვიტყოდი, რომ მქონოდა, არ არსებობს ადამიანი, ვისაც ხელს დავაფარებ, თუ მეცოდინება, რომ უცხო ქვეყნის წარმომადგენლებთან რამე ტიპის კავშირშია.
– არც სხვა მღვდელმთავრებზე გაქვთ მსგავსი ინფორმაცია?
– მღვდელმთავრებზე არა. თუმცა, უცხო ქვეყნის სპეცსამსახურებთან კავშირში არიან როგორც საერო, ისე სასულიერო პირები – ეს ჩვეულებრივი ამბავია, მაგაზე უნდა იმუშაო, გამოავლინო და აღკვეთო.
თამო კეშელავა, ალია
კომენტარები