რომან გოცირიძე სოციალურ ქსელში წერს:
„კორონავირუსი რომ საქართველოშიც გავრცელდებოდა, ეს დროის საკითხი იყო. არც სამით და არც ათით რომ არ შემოიფარგლება ინფიცირებულთა რაოდენობა, ესც ნათელია. თუ რამდენად მზად შეხვდა ამას ხელისუფლება, ეს ცალკე საუბრის საგანია და არაერთხელ მოგვიწევს ამაზე მსჯელობა.
შევეხოთ მხოლოდ ერთ საკითხს-პანიკას და მის ეკონომიკურ შემადგენელს.
ზღვარგადასული შიში არასდროს არის გამართლებული. ის ხელს უშლის ჯანსაღად აზროვნებას და შესაბამისად რაციონალურად ქმედებას.
კოლექტიური პანიკა კარგად არის აღწერილი ”მასების ფსიქოლოგიაში”. ბრბო კარგავს პასუხისმგებლობის გრძნობას და მიდრეკილია ანტისაზოგადოებრივი და ირაციონალური ქცევისაკენ. ”ჯოგის ეფექტი” შეიძლება გამოვლინდეს მრავალი ფორმით.
კორონავირუსზე პირველი ”ჯოგური” რეაქცია იყო სურსათისა და პირველადი მოხმარების საგნების პანიკური შეძენის სურვილი. ჯერჯერობით ამას არ მიუღია კრიტიკული ხასიათი და ახლავე საჭიროა ახსნა, რომ მსგავსი ქცევა არის უშდეგო, უაზრო და დამაზიანებელი როგორც ცალკეული პირის, ასევე საზოგადოებისათვის.
საქართველო ღარიბი ქვეყანაა. მისი მოსახლეობის 69 პროცენტი ( დაახლებით 2,6 მილიონი კაცი) ღარიბია ან სიღარიბის ზღვართან ძალიან ახლოს იმყოფება.
დასაქმებულთა უდიდესი ნაწილისათვის შემოსავლის ძირითადი წყარო არის შრომის ყოველთვიური ანაზღაურება. მათი ფულადი დანაზოგები უკიდურესად მწირია. როდესაც საზოგადოების ის ფენა, რომელსაც აქვს შესაძლებლობა მოიმარაგოს გარკვეული რაოდენობის მატერიალური რეზერვები, ის უძვირებს ცხოვრებას როგორც სხვას, ასევე საკუთარ თავსაც. იგი ქმნის სხვადასხვა სახის პრობლემას, უსაფუძვლოდ ზრდის იმპორტს, რაც თავის მხრივ ლარის სტაბილურობაზეც ახდენს გავლენას.
ქვეყანაში არის ასეულ ათასობით ადამიანი, რომელიც ოჯახს არჩენს ყოველდღიური შემოსავლით ( ტაქსის მძღოლები, ხელოსნები, ვაჭრობაში დასაქმებულები და ა.შ.). მათ მარაგების შექმნა არ შეუძლიათ, დაავადების შემთხვევაში კი ოჯახები ვარდებიან უმძიმეს მდგომარეობაში. სოციალურად დაუცველი ოჯახებისათვის, პენსიონერებისთვის, შშმ პირებისათვის, მარტოხელა ადამიანებისთვის ავადმყოფობა კატასტროფის ტოლფასია.
ხელისუფლება უნდა იყოს მზად მოვლენების სხვადასხვა სცენარით განვითარებისათვის, ჩვენ კი გამოწვევების მშვიდად, პანიკური შეტევების გარეშე გასამკლავებლად.
როგორც ყველა ომი ზავით მთავრდება, ყველა ვირუსი საბოლოო ჯამში მარცხდება. მთავარია ის, რომ გამარჯვებას მინიმალური ზიანით მივაღწიოთ.“
კომენტარები