Institute for the Study of War-ის ბოლო ანგარიშის მიხედვით, ბოლო 24 საათის განმავლობაში რუსეთს კიევის გარმშემო მყოფი სამხედრო ძალების ნაწილი ბელარუსში გადაჰყავს. გასული დღის მანძილზე, ოკუპანტებს ქალაქის ირგვლივ შეტევითი ოპერაციები არ განუხორციელებიათ, მაგრამ რუსული ძალები, სავარაუდოდ, გააგრძელებენ თავიანთი პოზიციების შენარჩუნებასა და საცხოვრებელი ტერიტორიების დაბომბვას. ბოლო 24 საათის განმავლობაში, უკრაინის სამხედრო ძალებმა დონეცკისა და ლუგანსკის ოლქებში რუსული თავდასხმები მოიგერიეს. ამასთან ერთად, რუსულმა ძალებმა დაიკავეს თავიანთი პოზიციები და ქვეყნის დანარჩენ ქალაქებში შეტევითი ოპერაციები არ ჩაუტარებიათ. ოკუპანტები მარიუპოლს სავარაუდოდ რამდენიმე დღეში აიღებენ, თუმცა დიდი სამხედრო დანაკლისით. ასევე, ნაკლებად სავარაუდოა, რომ კიევიდან დაზიანებული ერთეულების გადაყვანისაა და ძალების გადაწყობით რუსეთმა დონბასის მიმართულებით წარმატებებს მიაღწიოს.
ISW-ს ძირითადი დასკვნები:
- რუსეთის სამხედრო ძალები განაგრძობენ კიევის გარშემო თავდაცვითი პოზიციების გამყარებას, უკრაინის კონტრშეტევებისგან თავის დასაცავად. ამასთან ერთად, ნაკლებად სავარაუდოა, რომ რუსულმა ძალებმა დათმონ ტერიტორიები ქალაქის გარშემო.
- ISW-ს 30 მარტის ანგარიშის მიხედვით, რუსეთი გეგმავს კიევის გარშემო მყოფი ქვედანაყოფები გაანაწილოს სხვა მიმართულებებით, სადაც ოკუპანტებმა წინსვლას მიაღწიეს. ამ დრომდე რთულია ჩერნიგოვის ირგვლივ ოკუპანტების მდგომარეობაზე საუბარი.
- ბოლო 24 საათის განმავლობაში, რუსეთის სამხედრო ძალებს უკრაინის ჩრდილო-აღმოსავლეთ ნაწილში შეტევითი ოპერაციები არ ჩაუტარებიათ.
- იზიუმთან რუსეთის მე-20 გაერთიანებული და 1-ლი გვარდიის სატანკო არმიის ელემენტები ხელახლა იკრიბებიან, თუმცა ნაკლებად სავარაუდოა ქალაქის უახლოეს მომავალში დაკავება.
- უკრაინის სამხედრო ძალებმა დონეცკისა და ლუგანსკის ოლქებში ოკუპანტების შეტევები მოიგერიეს. ამასთან ერთად, რუსეთის სამხედრო ძალებმა განაგრძეს მარიუპოლში ტერიტორიის დაკავება, თუმცა დიდი ადამიანური დანაკარგი განიცადეს.
უკრაინის გენერალური შტაბის მტკიცებით, რუსეთი სულ უფრო მეტად აგზავნის დამხმარე პერსონალს უკრაინაში საბრძოლო დანაკარგების შესაცვლელად. ოკუპანტებისთვის სამხედრო ოფიცრების დანაკარგი და გადაწყვეტილება სასწავლო დანაყოფების პერსონალის შემცირების შესახებ, კიდევ უფრო შეაფერხებს ოკუპატების შესაძლებლობას მოამზადოს ახალი წვევამდელები და ჩამნაცვლებლები. უკრაინაში, დაუზუსტებელ ლოკაციებზე გადასხეს სამი ბატალიონი ტაქტიკური ჯგუფი, რომლებიც დაკომპლექტებულია ოკუპირებული ცხინვალისა და აფხაზეთის ტერიტორიებზე მყოფი რუსეთი მე-4 და მე-7 სამხედრო ბაზებზე მოსამსახურე რუსი, ოსი და აფხაზი სამხედროებისგან. მათი რიცხვი დაახლოებით 2 000-ს უტოლდება.
უკრაინის გენერალურმა შტაბმა დამატებით განაცხადა, რომ რუსეთს კვლავ მომარაგების პრობლემები აქვს. 26-ე სატანკო პოლკში საკონტრაქტო ჯარისკაცები (მოხალისეები, არა წვევამდელები), ითხოვენ კონტრაქტის შეწყვეტასა და გარნიზონის სამსახურში გადაყვანას. 150-ე მოტომსროლელი დივიზიის ელემენტები სამხედრო საცავიდან იღებენ გაუმართავ აღჭურვილობას. უკრაინის მთავარი სადაზვერვო სამმართველოს მტკიცებით, რუსეთის სამხედრო შესყიდვები “ჩავარდნის ზღვარზეა” დასავლეთის სანქციების გამო და რუსეთს არ შეუძლია თანამედროვე იარაღისა და აღჭურვილობის დამოუკიდებლად წარმოება.
კომენტარები