ომსკის საავადმყოფოს მთავარმა ექიმმა ალექსანდრე მუხაროვსკი ალექსეი ნავალნის გერმანულ კლინიკაში გადაყვანისთვის ნებართვის გაცემაზე უარს აცხადებს. მისი თქმით პაციენტის ტრანსპორტიორება არ შეიძლება.
ვიდეოინტერვიუში ექიმი ამბობს, რომ ნავალნის მდგომარეობის გაუარესება ორგანიზმში ნახშირწყალბადის ბალანსის დარღვევა გახდა. მან ასევე განაცხადა, რომ ოპოზიციის ლიდერს ნივთიერებათა ცვლა დაერღვა, ხოლო შაქრის დონის დაწევამ ორგანიზმში შესაძლოა გონების დაკარგვა გამოიწვიოს.
რამდენიმე საათის წინ ნავალნის მეუღლემ იულიამ მეუღლის საზღვარგარეთ გადაყვანის შესახებ ვლადიმირ პუტინს ოფიციალური წერილით მიმართა, რის საპასუხოდაც პრეზიდენტის პრესმდივანმა დმიტრი პესკოვმა განაცხადა, რომ ნავალნის გადაყვანის თაობაზე არანაირი ბარიერები არ არსებობს, ექიმების ნებართვის გარდა.
ამავე დროს ინტერნეტში ქვეყნდება ფოტოები, სადაც საავადმყოფოში არსებული სანიტარული მდგომარეობაა ასახული. ანალოგიურ განცხადებას ავრცელებს ნავალნის ძმა ოლეგიც, რომელმაც საავადმყოფოში არსებული ვიტარება ციხის საავადმყოფოს შეადარა.
როგორც ცნობილია, ალექსეი ნავალნის გერმანიაში გადასაყვანად გერმანიიდან თვითმფრინავი გაგზავნეს.
20 აგვისტოს ქალაქ ტომსკიდან მოსკოვში თვითმფრინავით მგზავრობისას, ალექსეი ნავალნი ცუდად გახდა, რის გამოც თვითმფრინავი ავარიულად, ომსკში დაეშვა, სადაც ნავალნი მოწამვლის სიმპტომებით რეანიმაციაში მოათავსეს. პოლიტიკოსის მდგომარეობა მძიმეა, ის ხელოვნურ კომაში იმყოფება და ფილტვების ხელოვნური ვენტილაციის აპარატზეა შეერთებული.
კომენტარები