საქართველოს შინაგან საქმეთა მინისტრი, ვახტანგ გომელაური ამბობს, რომ “იცის” სად არის ზუგდიდში “საქართველოს ბანკის” ფილიალიდან 500 ათასი დოლარის შეიარაღებული თავდასხმით მითვისებაში ბრალდებული. ამ საკითხზე მას ჟურნალისტებმა “პოლიციის დღის” ღონისძიებაზე ჰკითხეს, სადაც ის პოლიციის მიღწევებზე საუბრობდა:
“ბადრი ესებუა სადაც არის, ვიცით ჩვენ… ისვენებს…” – თქვა მინისტრმა და კარგად რომ დავფიქრდეთ, კი არ არის გამორიცხული, მართალს ამბობდეს.(?)
ვიტყოდით, რომ ესებუა ისე დაღალეს პოლიციელებმა, რომ პოლიციელის დღეს – ისვენებს, მაგრამ, არც სხვა დღეებში უდგანან კვალზე, როგორც ჩანს, თორემ, აქამდე დააკავებდნენ.
შეგახსენებთ იმასაც, რომ შს მინისტრი გვიმტკიცებდა, რომ ესებუას ქვეყანა არ დაუტოვებია, თუმცა, ბანკის ძარცვიდან მალევე გომელაური ბათუმს სტუმრობდა, მაშინ ჟურნალისტებს უთხრა, რომ სავახშმოდ მიდიოდა, რას ვიზამთ, სულ ესებუა ხომ არ დაისვენებს, ზოგჯერ შს მინისტრსაც სჭირდება დასვენება.
იხუმრეთ, მინისტრო, იხუმრეთ, ის ვიდეოც სახუმაროა, სადაც ჩანს, როგორ უჩოქებს პოლიციელი ესებუას და ისე აწვდის ფულს? წესით, სისხლი უნდა გაწვებოდეთ ამის გახსენებისას, მაგრამ ჩვენ რას გავუგებთ, ჩინოვნიკების იუმორს?
ბადრი ესებუას ბრალი ედება ზუგდიდში, „საქართველოს ბანკის“ ფილიალზე თავდასხმაში.
მძევლების ეტაპობრივად გათავისუფლების შემდეგ შეიარაღებულმა ნიღბიანმა პირმა, რომელიც 500 ათას დოლარს და უსაფრთხოდ გადაადგილებას მოითხოვდა, სამ მძევალსა და სამეგრელო-ზემო სვანეთის პოლიციის დეპარტამენტის დირექტორ ავთანდილ გალდავასთან ერთად დატოვა ბანკის შენობა.
ავთანდილ გალდავა, რამდენიმე თვის წინ, აჭარის პოლიციის უფროსად გადაიყვანეს.
კომენტარები