შეერთებული შტატების წამყვანმა ინფექციონისტმა, ექიმმა ენტონი ფაუჩიმ ტელეკომპანია “ენ-ბი-სისთან” (NBC) პანდემიის მართვის სამომავლო პროგნოზებზე ისაუბრა. ის თეთრი სახლის უფროსი მრჩეველია მედიცინის მიმართულებით და 37 წელია ხელმძღვანელობს აშშ-ის ალერგიების და ინფექციურ დაავადებათა ეროვნულ ინსტიტუტს.
ფაუჩი ფიქრობს, რომ კოვიდ-19-ის შეკავება მალე იქნება შესაძლებელი და ეს 2022 წლის პირველ ნახევარში შეიძლება მოხდეს, თუკი ამერიკაში მეტი ვაქცინა დამტკიცდება და მეტი ადამიანი აიცრება.
მის ინტერვიუს ერთი დღით წინ უსწრებდა ამერიკულ კომპანია “ფაიზერში” წარმოებული კოვიდ-19-ის ვაქცინის სრული დამტკიცება, რომელიც გერმანულ “ბიონტექთან” ერთად შეიქმნა. შეერთებული შტატების სურსათის და მედიკამენტების ადმინისტრაციას ვაქცინა აქამდე მხოლოდ გადაუდებელი გამოყენების ავტორიზაციის აქტის საფუძველზე ჰქონდა დამტკიცებული, რაც საგანგებო ვითარებაში ხდება.
“თუკი შევძელით იმ დარჩენილი 80-90 მილიონი ადამიანის უმრავლესობის აცრა, ვინც ჯერ ვაქცინირებული არ არის, თავს იკავებს იმუნიზაციისგან, ან ჯერ არ ჰქონია ამის საშუალება, ვფიქრობ, გვირაბის ბოლოს სინათლის სხივის დანახვა შეგვეძლება” – განაცხადა ექიმმა ფაუჩიმ. ამას გარდა, ფაუჩის თქმით, თუ ვაქცინების უსაფრთხოება ბავშვებშიც დამტკიცდა და მათი აცრაც მოხდა, პანდემიის მიმდინარეობაში “გარდატეხის შეტანა შეგვეძლება”.
კომპანია “მოდერნა” ამ ეტაპზე უკვე მუშაობს სურსათის და მედიკამენტების ადმინისტრაციასთან კოვიდ-19-ის ვაქცინის სრულ დამტკიცებაზე და მას პერიოდულად მიღებულ კვლევების მონაცემებს აწვდის. “მოდერნას” ორდოზიანი ვაქცინის სრული დამტკიცება შესაძლოა სულ რამდენიმე კვირაში მოხდეს. კომპანიას “ჯონსონი და ჯონსონი” ერთდოზიანი ვაქცინის სრული დამტკიცებისთვის უსაფრთხოების და ეფექტურობის მონაცემების გაგზავნის პროცესი ჯერ არ დაუწყია, თუმცა ისიც გეგმავს ამ ნაბიჯის გადადგმას.
მას შემდეგ, რაც შეერთებულ შტატებში “ფაიზერის” კოვიდ-19-ის ვაქცინა ვაშინგტონმა ფედერალური მასშტაბით სრულად დაამტკიცა, სავალდებულო ვაქცინაციას სულ უფრო და უფრო მეტი ორგანიზაცია ითხოვს. ორშაბათს, ნიუ-იორკის მერმა ბილ დე ბლასიომ განაცხადა, რომ ქალაქის სკოლებში, რომლის მოსახლეობა 9 მილიონს აღემატება, საგანმანათლებლო სფეროში დასაქმებულებს კოვიდ-19-ზე ვაქცინაციას მოსთხოვს. საუბარია მასწავლებლებზე, დირექტორატზე და ოფისის მუშაკებზე, რომელთა რაოდენობა დაახლოებით 148 000-ია.
ნიუ-იორკის მსგავსი გადაწყვეტილება უკვე მიიღო ვაშინგტონის შტატმა, ასევე – ლოს-ანჯელესმა და ჩიკაგომ. ნიუ-იორკის განათლების სფეროს მუშაკებს ვაქცინის პირველი დოზის მიღების საბოლოო ვადად 27 სექტემბერი დაუწესდათ. მათ არ ექნებათ ტესტირებაზე უარყოფითი პასუხის წარდგენის ალტერნატივა.
შეერთებული შტატები 2020 წელს დაწყებული პანდემიის მთავარი მაჩვენებლებით კვლავ მსოფლიოს ლიდერია. დადასტურებულად ინფიცირებულთა რაოდენობა დაახლოებით 38 მილიონია, კოვიდ-19-ის გართულებების გამო სიკვდილობის მაჩვენებელი კი თითქმის 630 000-ს უდრის. აღნიშნული ინფორმაცია ჯონს ჰოპკინსის უნივერსიტეტის კორონავირუსის კვლევის ცენტრის მონაცემებს ეყრდნობა.
წყარო – ამერიკის ხმა
კომენტარები