„როდესაც პოლიტიკოსი, რომელსაც მხარს უჭერდნენ, კორუმპირებული თუ მატყუარა აღმოჩნდება, ადამიანები იწყებენ მის გამართლებას – “ტყუილია”, “მტრებმა მოუგონეს“ – ზურაბ ფარჯიანი

ჩემი აზრით, ამას კარგად ხსნის “კოგნიტური დისონანსის” შესახებ თეორია, რომელიც წარმოიშვა ამერიკულ სექტაზე, სახელად „მაძიებლები“ (The Seekers) დაკვირვებიდან.

სექტას ხელმძღვანელობდა ვინმე დოროთი მარტინი, რომელიც ამტკიცებდა, რომ იღებდა შეტყობინებებს უცხოპლანეტელებისგან პლანეტა კლარიონიდან, რომლებსაც ის “მცველებს” უწოდებდა.

ქალბატონი დოროთი ასევე ამტკიცებდა, რომ წინასწარმეტყველებებს პირადად იღებდა ქრისტესგან, რომელიც ასევე პლანეტა კლარიონზე ცხოვრობდა.

გზავნილების თანახმად: 1954 წლის 21 დეკემბერს შეერთებულ შტატებს ძლიერი მიწისძვრა და უზარმაზარი ცუნამი გაანადგურდებდა, ჭეშმარიტ მორწმუნეებს კი უცხოპლანეტელები გადაარჩენდნენ და კლარიონზე წაიყვანდნენ.

სექტა რამდენიმე ათეული ადამიანისგან შედგებოდა – ინჟინრების, დიასახლისების, ოფისის მუშაკებისა და სტუდენტებისგან. ბევრმა სამსახური მიატოვა, ოჯახებთან კავშირი გაწყვიტა და მთელი ქონება გაყიდა, რათა სრულიად დაეთმოთ დრო კლარიონზე გადასახლებისთვის.

სწორედ ამ სექტაში გაწევრიანდა თეორიის ავტორი, ამერიკელი ფსიქოლოგი ლეონ ფესტინგერი და მისი 2 კოლეგა.

“პაციენტების” საკვლევად.

მთავარი კითხვა იყო: რა მოხდებოდა, როდესაც წინასწარმეტყველება არ ახდებოდა?

გააგრძელებდნენ თუ არა ეს ადამიანები სისულელეების დაჯერებას იმის მიუხედავად, რომ რეალობა/ფაქტები დამაჯერებლად დაადასტურებდა მათი რწმენის სიმცდარეს?!

დადგა “სამყაროს აღსასრულის” დღეც.

1954 წლის 21 დეკემბერს ჯგუფის წევრები ლიდერის სახლში შეიკრიბნენ, ყველა ლითონის საგანი მოიშორეს, რათა „უცხოპლანეტელთა ხომალდის რადიაცია არ დაეზიანებინათ“ და მთელი ღამე ელოდნენ ხომალდის მოსვლას.

ბუნებრივია, არც მიწისძვრა და არც ცუნამი არ მომხდარა. არც არავინ მოსულა.

დილის 4:45 საათზე სექტის სულიერმა ლიდერმა უცხოპლანეტელებისგან ახალი „შეტყობინება“ მიიღო: „ჭეშმარიტი მორწმუნეების ამ ჯგუფის გამოვლენილმა რწმენამ დედამიწაზე იმდენი სინათლე გაავრცელა, რომ მოსალოდნელი კატასტროფა თავიდან ავიცილეთ“-ო.

ახლა ხომ გგონიათ, ეს როგორც კი გაიგო, ყველამ დატოვა სექტაო?! ნურას უკაცრავად!

შეცდომის აღიარების ნაცვლად, სექტის წევრების უმეტესობამ გააძლიერა რწმენა.

სექტიდან მხოლოდ რამდენიმე ადამიანი წავიდა, ვინც ნაკლები მსხვერპლი გაიღო და ნაკლებად იყო ჩართული (მათ არ მიუტოვებიათ სამსახური ან ოჯახი) –

წავიდნენ ადამიანები, რომლებსაც შეეძლოთ „წასვლა“ დიდი დანაკარგების გარეშე.

დანარჩენების რწმენა, პირიქით, გაძლიერდა. მათ აქტიურად დაიწყეს ქადაგება, ბროშურების გავრცელება და ახალი მიმდევრების ძებნა.

ფესტინგერის დასკვნით, როდესაც ადამიანი წააწყდება ინფორმაციას, რომელიც ეწინააღმდეგება მის ფუნდამენტურ რწმენას და შეხედულებებს, მას წარმოექმნება შინაგანი კონფლიქტი – “კოგნიტური დისონანსი”.

ადამიანის ფსიქიკას არ შეუძლია აიტანოს ეს ლოგიკური წინააღმდეგობა „მე მართალი ვიყავი“-სა და „ფაქტებს” შორის;

შესაბამისად ადამიანი ან იცვლის თავის რწმენას და აღიარებს, რომ ცდებოდა (რაც იშვიათად ხდება), ან რეალობას ხელახლა განმარტავს/აფორმატირებს ისე, რომ ყველაფერი ისევ თანმიმდევრულად დალაგდეს მის ტვინში.

ამ სექტის შემთხვევაში, მსჯელობის ჯაჭვი დალაგდა შემდეგნაირად: სამყაროს აღსასრული არ მომხდარა, რადგან ჩვენმა რწმენამ გადაარჩინა კაცობრიობა. შესაბამისად მართლები ვიყავით და ამიტომ ყველას უნდა ვუთხრათ ამის შესახებ.

როდესაც “რწმენა” თვითიდენტობის განუყოფელი ნაწილი – ადამიანი ირჩევს საკუთარ შექმნილ “იდენტობას”.

ეგ იდენტობა შეიძლება ყველანაირი იყოს, შეიძლება გჯეროდეს “დიფ სტეიტის” და ეგ იყოს შენი “რწმენა”, გჯეროდეს რომ დედამიწა ბრტყელია, რეპტილოიდები გვმართავენ, ელვისი ცოცხალია და ასე შემდეგ.

ასეთი ადამიანები თავიანთ იდენტობას და მათ ტვინში გაბატონებულ რწმენას ფაქტებზე მაღლა აყენებენ.

მათ არ აინტერესებთ ფაქტები და სიმართლე. აინტერესებთ მხოლოდ ის “ფაქტები” ,რომლებიც მათ “რწმენას” შეესაბამება.

და როდესაც პოლიტიკოსი, რომელსაც მხარს უჭერდნენ, კორუმპირებული თუ მატყუარა აღმოჩნდება, ადამიანები იმის ნაცვლად, რომ ფაქტები მიიღონ და დაიჯერონ, რომ მართლა კორუმპირებულია და მართლა ამოუღეს 7 მილიონი, იწყებენ მის გამართლებას “არა, ის ასეთი არ არის”; “ტყუილია”, “მტრებმა მოუგონეს” და ასე შემდეგ.

ასე იქმნება ცარიელ ადგილზე კერპები და ამიტომაა ძნელი მათთან ბრძოლა.

ადამიანების რაღაც ნაწილს უბრალოდ ვერ “მოაბრუნებთ”, რადგან მათ ძალიან ბევრი “ჩადეს” საკუთარ “რწმენაში”.

განსაკუთრებით პროპაგანდის ნიაღვროს გათვალისწინებით“