სახელმწიფო კონსილიუმის ერთ-ერთი წევრის თქმით, რეფიდინგის პროცესი ძალიან საყურადღებოა და ის მუდმივ მონიტორინგს საჭიროებს.
გორის სამხედრო ჰოსპიტალში კონსილიუმის წევრი ექიმები ცოტა ხნის წინ შევიდნენ, ადგილზე მივიდა მიხეილ სააკაშვილის პირადი ექიმი ნიკოლოზ ყიფშიძეც.”ვიცით, რომ ექიმები უკვე აქტიურად მუშაობენ. იცით თქვენ, რომ ჩვენ გახლავართ კონსილიუმი, რომელიც პრაქტიკულად, მესამე პრეზიდენტის შიმშილობის დაწყებიდან მასთან ძალიან აქტიურად მუშაობდა, შესაბამისად ჩვენ ვაგრძელებთ ამ მუშაობას, ჩვენი ასეთი ერთობლივი შეჯერებული აზრი ყოველთვის გათვალისწინებულია.
შეჯერებულია ჯანდაცვის სამინისტროსთან ეს ვიზიტი და ჯანდაცვის სამინისტრო ერთ-ერთი ინიციატორია.
ანალიზების შესახებ ჩვენ ამ წუთში ინფორმაცია არ გვაქვს, ადგილზე ყველაფერს ვნახავთ.
რეფიდინგის პროცესი ძალიან საპასუხისმგებლოა და ძალიან დიდ ყურადღებასა და აქტიურ მონიტორირებას გულისხმობს”,- თქვა კონსილიუმის წევრმა, ალექსანდრე ცისკარიძემ.
მისივე თქმით, ამ დროისთვის მესამე პრეზიდენტის ანალიზების პასუხები უცნობია. მიხეილ სააკაშვილის ჯანმრთელობის მდგომარეობის შესახებ დამატებითი ინფორმაცია ექიმებთან ვიზიტის შემდეგ გახდება ცნობილი.
ცნობისთვის, მიხეილ სააკაშვილი გორის სამხედრო ჰოსპიტალში გუშინ გვიან ღამე გადაიყვანეს. იუსტიცის სამინისტრომ მესამე პრეზიდენტს სამოქალაქო კლინიკაში გადაყვანა, შიმშილობის 50 დღის შემდეგ შესთავაზა.
მანამდე ხელისუფლების წარმომადგენლები მის მრავალპროფილურ კლინიკაში გადაყვანაზე უარს ამბობდნენ, და ამტკიცებდნენ, რომ გლდანის მე-18 სამკურნალო დაწესებულება, სადაც ის იმყოფებოდა, სამკურნალოდ ყველა პირობას აკმაყოფილებდა.
კომენტარები