„თუკი უკეთესი შედეგი იქნება, ვიდრე მოლოდინია, ეს რა თქმა უნდა პოზიტიური პროცესია და პოზიტიურად უნდა აღვიქვათ, რომ არასწორი პროგნოზები კეთდება” – ასე აფასებს „რეზონანსთან” საუბრისას პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე, დიმიტრი ხუნდაძე კორონავირუსის გავრცელების მასშტაბებთან დაკავშირებით დაავადებათა კონტროლის ეროვნული ცენტრის ხელმძღვანელის, ამირან გამყრელიძის პროგნოზს, რომელიც არ გამართლდა.
სამშაბათს, 7 აპრილს ამირან გამყრელიძემ განაცხადა, რომ კვირის ბოლოს კორონავირუსით ინფიცირების 350-400 შემთხვევა გვექნებოდა. თუმცა, 11 აპრილის ოფიცილური მონაცემებით, კორონავირუსით ინფიცირების შემთხვევათა რაოდენობა გაცილებით ნაკლები – 233 იყო.
ხუნდაძე ამბობს, რომ ინფექციის გავრცელების ყოველი მომდევნო ფაზა დამოკიდებულია იმაზე, თუ წინა ფაზას როგორ გადავლახავთ.
„ერთი რამ უნდა გავითავისოთ – რომ ჩვენ არა მათემატიკასთან, არამედ ეპიდემიასთან გვაქვს საქმე. ამიტომ ზუსტი ციფრების მაღალი სიზუსტით პროგნოზირება და თქმა ძალიან რთულია. თუმცა, თუკი უკეთესი შედეგი იქნება ვიდრე მოლოდინია, ეს რა თქმა უნდა პოზიტიური პროცესია და პოზიტიურად უნდა აღვიქვათ, რომ არასწორი პროგნოზები კეთდება.
„ზოგადად, რამდენიმე სცენარია – არის მოსალოდნელი სცენარი იმ ეპიდვითარებიდან გამომდინარე, რა რეალობაშიც ახლა ვართ. მაგრამ არის ინფიცირებულთა რაოდენობის ნახტომისებური ზრდის საშიშროება და რთული სცენარი, რაშიც წესით ჩვენ არ უნდა აღმოვჩნდეთ, მაგრამ შესაძლოა თეორიული სცენარი პრაქტიკულშიც გადმოვიდეს. ეს, ბევრ სხვა ფაქტორთან ერთად, საზოგადოების ქცევაზეცაა დამოკიდებული. ის რეკომენდაციები რაც გაცემულია, რაც შეიძლება მაღალ ხარისხში უნდა იქნას შესრულებული.
„ჩვენ ვართ პრეკრიზისულ ფაზაში. პრეკრიზისული ფაზა არამძიმე სცენარით მიმდინარე გვაქვს და ის ზის იმ მოლოდინებში, რა მოლოდინებიც გვქონდა. შესაძლოა მცირე ცდომილებით, მაგრამ ყოველ შემთხვევაში მოსალოდნელ სცენარს დიდად არ ვცილდებით. ეს გამომდინარეობს იქიდან, რომ წინა, ანუ შეკავების ფაზა ჩვენ სწორად გავიარეთ.
„ამიტომ პრეკრიზისული ფაზის შემდგომი კრიზისული ფაზის სიმძიმეც დამოკიდებულია იმაზე, თუ პრეკრიზისულს როგორ გავივლით. ანუ, ყოველი შემდგომი ფაზა დამოკიდებულია, თუ როგორ გავივლით წინას. ამიტომაც, მაქსიმალურად უნდა დავიცვათ რეკომენდაციები, რომ მოსალოდნელი კრიზისული ფაზა იყოს მოსალოდნელი მსუბუქი სცენარით და არა თეორიული მძიმე სცენარით.
„თუმცა, ჩვენ ყველაზე მძიმე სცენარისათვის უნდა მოვემზადოთ. კრიზისულ ფაზაში მთავარი როლი, ანუ შემოტევის პირველი დაცვის ხაზი მედპერსონალი, ჰოსპიტალური სექტორი იქნება. სწორედ ამიტომ, ჩვენ რეგიონებში დავდივართ. ახლა სენაკში ვიმყოფები, რომ კიდევ ერთხელ გადავამოწმოთ, თუ რამდენადაა მზაობა ჰოსპიტალური სექტორის პაციენტთა მოზღვავებული რაოდენობის მიღებისთვისაც კი, ესაა ჩვენი მიზანი”, – აცხადებს ხუნდაძე.
კომენტარები