პარლამენტმა გასაკეთებელი გააკეთა – კანონმდებლებმა ჯერ საკონსტიტუციო ცვლილებები დააჩაქუჩეს ისე, რომ ნაციონალებისა და ევროპული საქართველოს დეპუტატების დახმარება არ დასჭირვებიათ, შემდეგ კი უფრო მარტივად, საარჩევნო კოდექსში მიიღეს ცვლილებები. ახლა ყველა პოლიტიკურ ძალას თამამად შეუძლია საარჩევნო კამპანია დაგეგმოს და დაიწყოს, რადგან ზუსტად იცის, როგორ, რა პირობებითა და თამაშის რა ახალი წესებით ჩატარდება 2020 წლის არჩევნები. როგორც ვივარაუდეთ, ოპოზიციურ ერთობას დიდი ბზარი გაუჩნდა, გასულ კვირას ეს ბზარი ნაპრალად იქცა და ამ კვირაში უფსკრულად გადაიქცევა.
ახლა, ისე არ გაიგოთ, ოპოზიციაში ამღვრეული წყლის ფონზე, ხელისუფლება დიდ თევზზე ნადირობდეს. დიდზე კი არა, შავ დღეშია „ქართული ოცნება“ და განსაკუთრებით მისი ლიდერები. სანამ კონსტიტუციაში შესწორებას შეიტანდნენ, კობახიძე-თალაკვაძე-მდინარაძის ტრიო პრაქტიკულად ყველა დეპუტატს ჩუმად დაპირდა, რომ მაჟორიტარობას თუ არა, სიაში ადგილს აუცილებლად უბოძებდნენ, ოღონდ ეს ამბავი არ უნდა გახმაურებულიყო. შედეგად, საკონსტიტუციო ცვლილებების მიღების შემდეგ, ბიჭებმა დანაპირებს შესრულება მოთხოვეს, მითუმეტეს, რომ მმართველი გუნდი ერთი შეხედვით, დღე-დღეზე აპირებდა კანდიდატების დასახელებას, თუმცა…
„ივანიშვილმა პარტიის ლიდერებს უთხრა, როგორც გინდათ, საკონსტიტუციო ცვლილებები ისე მიიღეთო. მას შემდეგ კი, რაც გაირკვა, რომ მწვანე ღილაკს ხელი უმრავლესობამ სწორედ დაპირების სანაცვლოდ დააჭირა, ივანიშვილმა ამჯერად ლიდერებს დაავალა, როგორც დაპირდით, ისე გაეცით პასუხიო და სწორედ ამის ბრალი იყო, უმრავლესობის ბოლო სხდომაზე, ივანიშვილი არც მივიდა და არც პირდაპირ რეჟიმში ჩაერთო. მას არ სურდა პასუხი ეგო იმ დაპირებებზე, რომელიც თავად არ გაუცია“, – გვეუბნება უმრავლესობის წევრი.
მისივე თქმით, სიტუაცია იმდენად დაძაბულია, რომ „ქართული ოცნება“ მაჟორიტარების წარდგენას ვერც ამ კვირაში შეძლებს და ძალიან დიდი ალბათობით, ვერც მომავალ კვირაში მოახერხებს ამის გაკეთებას. ჯერ ერთი, პრაქტიკულად ყველა კადრი უშუალოდ ივანიშვილთან არის შესათანხმებელი და მეორეც, ჩასატარებელია უმრავლესობის სხდომა, რომელზეც უნდა მივიდეს ივანიშვილი და უნდა თქვას, რომ პარტიის გადაწყვეტილება არ გაპროტესტდება, ხოლო ურჩები სამაგალითოდ დაისჯებიან.
ანი დვალიშვილი, ალია №23
კომენტარები