ქართული ოცნების გუნდის ლიდერმა, შალვა პაპუაშვილმა ახალი ვადა დაუწესა
“ALDE”-ს და “ლელო ძლიერ საქართველოს”, კერძოდ ორშაბათამდე, თუმცა, არ ამბობს, რას უზამთ მათ, თუ ორშაბათამდე ალეკო ელისაშვილს არ გარიცხავენ.
„ორშაბათამდე კიდევ არის დრო ALDE-სთვის და “ლელოსთვის”, რომ უკვე ფორმალურადაც არ გახდნენ ტერორისტთან თანამშრომლობაში მყოფი პარტია“, – წერს პაპუაშვილი.
მან 3 დეკემბერს განაცხადა, რომ თუ ციხეში მყოფ ალეკო ელისაშვილს არ გარიცხავენ, ორშაბათიდან „მოქალაქეები“, „ძლიერი საქართველო“ და „ალდე“ „ოფიციალურად გახდებიან ტერორისტის მფარველი ორგანიზაციები“.
პაპუაშვილის განცხადებას გამოეხმაურა კოალიცია “ძლიერი საქართველო-ლელო” და განაცხადა, რომ ალეკო ელისაშვილის ქმედებასთან დაკავშირებით “ძლიერ საქართველო-ლელოს” ოფიციალური განცხადება გაკეთებული აქვს და შალვა პაპუაშვილს შეუძლია იხელმძღვანელოს ამ პოზიციით.
კომენტარები