სურსათის უვნებლობის საკონსულტაციო კომპანია სერთიფუდი, სოციალურ ქსელში, ვიდეოს ავრცელებს, სადაც, კომპანიის ერთ–ერთი დამფუძნებელი, ანდრია კალანდია, ამბობს:
რას გვატყუებს იფქლი? შეიძლება თუ არა ეწეროს ამ პროდუქტს 0%-იანი შაქარი, როდესაც შაქრის შემცველობა ამ განცხადების გამოყენებისთვის დასაშვებ კრიტერიუმს სამჯერ აღემატება? ან შეიძლება თუ არა ერქვას ამ პროდუქტს ქატოს პური, როდესაც მასში ქატოს შემცველობა მხოლოდ 2,98%-ია?
პლატფორმას სერთიფუდი დღეს კანონის ენაზე ავხსნით, რა დგას ამ წარწერების უკან – პროდუქტის რეალური მახასიათებლები თუ მარკეტინგული ხრიკები, რომლითაც ვტყუვდებით.
ჯანმრთელობასთან დაკავშირებული განცხადებები, როგორიც არის შაქრის, ნაჯერი ცხიმოვანი მჟავების გარეშე, ცილის წყარო და ასე შემდეგ, მთავრობის 510-ე დადგენილებით რეგულირდება, რომელიც არც მეტი, არც ნაკლები, 10 წელია ძალაშია. ამ დადგენილების დანარჩენში მითითებული განმარტებით, განცხადება „უშაქრო“ ან „შაქრის გარეშე“ ან ნებისმიერი განცხადება, რომელსაც მომხმარებლისთვის სავარაუდოდ იგივე მნიშვნელობა აქვს, შესაძლებელია გამოყენებული იქნას მხოლოდ იმ შემთხვევაში, თუ სურსათის 100 გ-ში ან 100 მლ-ში შაქრის შემცველობა არაუმეტეს 0,5 გ-ია.
იფქლის, ვითომ ქატოს პურის ეტიკეტზე დეკლარირებული შაქრების შემცველობა 1,6 გ-ია. ანუ მას ამ განცხადების შეფუთვაზე გამოყენება კანონით ეკრძალება.
და რას ფიქრობთ, რამდენ პროცენტ ქატოს უნდა შეიცავდეს ქატოს პური? 2,98%-ი საკმარისია? მთავრობის 301-ე დადგენილება გვეუბნება, რომ სურსათის დასახელება, აღწერილობა თუ შეფუთვა მომხმარებელს სურსათის მახასიათებლების შესახებ მცდარ წარმოდგენას არ უნდა უქმნიდეს. სამწუხარო რეალობაა, რომ სახელისუფლებო მაკონტროლებელი ხშირად სურსათის ეტიკეტზე მხოლოდ 301-ე დადგენილების მე-8 მუხლით გათვალისწინებული ინფორმაციის არსებობას ამოწმებს, როგორიცაა სურსათის დასახელება, ინგრედიენტების ჩამონათვალი, წარმოების შესახებ ინფორმაცია და ასეთ სიღრმისეულ დეტალებს არ აკვირდება.
კონტროლის მექანიზმები და საკანონმდებლო ბაზა, რომლის შექმნაზეც უამრავი რესურსი დაიხარჯა, ხშირად არავინ კითხულობს და matsne.gov.ge-სთვის დამატებითი ტვირთია. ეს რა თქმა უნდა მწარმოებლებმა ძალიან კარგად იციან, მორიდების გარეშე ხუნძლავენ ეტიკეტს კანონსაწინააღმდეგო განცხადებებით, ქმნიან ჯანსაღი პროდუქტის ილუზიას და ასე ზრდიან გაყიდვებს.
ეს კანონდარღვევა ჩვენმა ერთ-ერთმა გამომწერმა გაგვიზიარა. სწორედ ეს არის სერთიფუდის მთავარი მოტივაცია და მიზანიც – უკვე ძალიან ბევრი თქვენგანი დამოუკიდებლად, კრიტიკულად ეცნობა სურსათის მახასიათებლებს მის შეძენამდე, ავლენს კანონდარღვევებს და ხდება საქართველოში, სურსათის უვნებლობის სფეროში, დადებითი ცვლილებების მონაწილე.
ჩვენ სურსათის უვნებლობის საკონსულტაციო კომპანია “სერთიფუდი” ვართ. თუ გჭირდება ამ სფეროში ყველაზე ხარისხიანი და სრულყოფილი სერვისი, როგორიც არის HACCP სისტემის დანერგვა, ეტიკეტირება, ვარგისიანობის ვადის განსაზღვრა, აუდიტები და სხვა, იცი, რომ ჩვენ უნდა დაგვიკავშირდე.
კომენტარები