Financial Times-ის ინფორმაციით, Alfa Group-ის დამფუძნებელი, მილიარდერი მიხაილ ფრიდმანი რუსეთის მიერ უკრაინის წინააღმდეგ დაწყებულ ომს ეწინააღმდეგება.
მიხაილ ფრიდმანი, რომლის ქონებაც Forbes-ის მიერ $11.7 მილიარდად არის შეფასებული, ამ დროისთვის უმდიდრესი ოლიგარქია, რომელიც ომის წინააღმდეგ საუბრობს.
“მე დასავლეთ უკრაინაში დავიბადე და ვცხოვრობდი 17 წლამდე. ჩემი მშობლები უკრაინის მოქალაქეები არიან და დღემდე ცხოვრობენ ლვოვში, ჩემს საყვარელ ქალაქში. მაგრამ, მე ასევე გავატარე ჩემი ცხოვრების დიდი ნაწილი, როგორც რუსეთის მოქალაქემ, სადაც ვაშენებდი და ვზრდიდი ბიზნესს. უკრაინელ და რუს ხალხთან მჭიდრო კავშირი მაქვს და დღევანდელ კონფლიქტს ორივე მხარისთვის ტრაგედიად ვაფასებ.
მე არ ვაკეთებ პოლიტიკურ განცხადებებს, მე ვარ ბიზნესმენი, რომელიც პასუხისმგებელია ჩემი ათასობით თანამშრომლის წინაშე რუსეთსა და უკრაინაში. თუმცა დარწმუნებული ვარ, რომ ომი ვერასოდეს იქნება გამოსავალი, ეს კრიზისი გამოიწვევს სიცოცხლის უდიდეს დანაკარგს ორი ერისთვის, რომლებიც ასობით წლის განმავლობაში ძმობდნენ.
მიუხედავად იმისა, რომ გამოსავალი საშინლად შორს მეჩვენება, მე შემიძლია შევუერთდე მხოლოდ მათ, ვისი მხურვალე სურვილია სისხლისღვრის დასრულება. დარწმუნებული ვარ, ჩემი პარტნიორები იზიარებენ ჩემს შეხედულებას,”- აღნიშნა ფრიდმანმა თანამშრომლებისთვის ელექტრონული ფოსტით გაგზავნილ წერილში.
მიხაილ ფრიდმანი არის Alfa Group-ის დამფუძნებელი სამეთვალყურეო საბჭოს თავმჯდომარე, ასევე ლუქსემბურგში რეგისტრირებული საინვესტიციო ჰოლდინგის LetterOne-ის დამფუძნებელი და თავმჯდომარე.
Alfa Group-ის ჰოლდინგში 8 კომპანია და მათ შორის, თავად “ალფა ბანკიც” ერთიანდება. ამ რვა კომპანიიდან ერთი – IDS Borjomi International-ია, რომლის შემადგენლობაშიც “აიდიეს ბორჯომი საქართველო, შპს აიდიეს ბორჯომი ბევერიჯიზ კომპანიის საქართველოს ფილიალიც” შედის.
ფინანსური დოკუმენტის თანახმად, “აიდიეს ბორჯომი საქართველო, შპს აიდიეს ბორჯომი ბევერიჯიზ კომპანის საქართველოს ფილიალის” 60%-იან წილს “Alfa Group”-ი ფლობს, 40% კი მინორიტარი აქციონერების საკუთრებაშია, თუმცა ამ აქციონერების ვინაობა დოკუმენტში დასახელებული არაა.
ცნობილია ის, რომ 2013 წლამდე IDS Borjomi International-ის ძირითად აქციონერს ბიზნესმენ ბადრი პატარკაციშვილის საინვესტიციო ფონდი წარმოადგენდა. ამ აქტივებს პატარკაციშვილის ქვრივი ინა გუდავაძე განკარგავდა, რის შემდეგაც კომპანიის საკონტროლო პაკეტი “Alfa Group”-მა შეიძინა. უცნობია წარმოადგენს თუ არა ამჟამად პატარკაციშვილების ოჯახი IDS Borjomi International-ის მინორიტარ (40%-ის მფლობელ) აქციონერს.
წყარო – bm.ge
კომენტარები