“რამდენიმე წუთის წინ აშშ-ს ავიაციამ ბაღდადში საჰაერო იერიში მიიტანა PMF–ის სარდლობაზე” – გიორგი კობერიძე

სახალხო მობილიზაციის ძალები 250 ათასი სამხედროსაგან შედგება და მიუხედავად ერაყელებით დაკომპლექტებისა, ერთგულებას მაინც ირანს უცხადებენ ხოლმე.

სიტუაცია რეგიონში საკმაოდ დაძაბულია. ბოლო დღეებია აშშ-სა და ისრაელს ჰეზბოლაზე, პრო-ირანულ იემენელ ჰუთებზე, ირანულ რაკეტებსა და ერაყში მოქმედ ირანულ ძალებზე ნადირობა აქვთ გამოცხადებული. ამასთან, არაერთხელ აღინიშნა, რომ დღეს ირანის რეჟიმი ისეთი სუსტია, როგორც დიდი ხანია არ ყოფილა ის. წლობით პროტესტმა, წყლის კრიზისმა, სანქციებმა, ახალგაზრდა თაობამ და იდეოლოგიის კრიზისმა დიდი პრობლემები შეუქმნა რეჟიმს. მისთვის ესკალაცია შეიძლება პოზიციების გამყარების საფუძველიც იყოს (როგორც ეს ისრაელზე ჰამასის თავდასხმის შემდეგ მოხდა), მაგრამ ფართომასშტაბიან კონფლიქტმა შეიძლება დაასუსტოს ან სულაც დამხობა გამოიწვიოს. ამიტომაც საკმაოდ არაპროგნოზირებადი პოლიტიკური მდგომარეობაა იქ. როგორც აშშ-ს ნაციონალური უსაფრთხოების ყოფილმა მრჩეველმა და ცნობილმა ქორმა ჯონ ბოლტონმა CNN-თან საუბარში აღნიშნა, მდგომარეობა ირანის შიგნით საკმაოდ მძიმეა და გუშინდელი აფეთქებაც რეჟიმის უკიდურეს კრიზისზე მიუთითებსო.