საქართველოს მესამე პრეზიდენტის მიხეილ სააკაშვილის მიერ გაკეთებულ განცხადებას, რომ ის თვითმმართველობის არჩევნებამდე საქართველოში ჩამოვა, სოციალურ ქსელში ეხმიანება ყოფილი პარლამენტარი ირინა სარიშვილი. მისი თქმით, ოპოზიციას მიშასი ეშინია, რადგან თუ ჩამოვა, ორპოლუსიან არჩევნებზე ვისაც არ უნდა, ამ შიშის გამო ისევ “ოცნებას” მიცემს ხმას.
რა ვერ გავიგე იცი? ოპოზიციის ნაწილზე ვამბობ თორემ “ოცნებაზე” ისედაც გასაგებია. მიშასი ეშინიათ – თუ ჩამოვა, ორპოლუსიან არჩევნებზე ვისაც არ უნდა, ამ შიშის გამო ისევ “ოცნებას” მიცემს ხმასო, თორემ ისე არ მისცემდაო, რას ამბობთ უფიქრდებით მაინც? თქვენ ხო ხართ კაცო და რატომ ორპოლუსიანი? ვინც “ნაციონალურ მოძრაობას” აძლევს ხმას, ის თქვენსკენ არ გადმოიხრება მაინც, აქ იქნება მიშა თუ მთვარეზე და ვისაც მიშა არ უნდა, ის “ოცნებას” რატომ მიცემს ხმას, როცა ამ ორი ძალის გარდა კიდევ თქვენც ხართ? თუ თავად თვლით რომ არ ხართ?! და თუ ხართ, რა ორ პოლუსზე ლაპარაკობთ და რაღა განერვიულებთ, ვერ გამიგია ჩემმა მზემ.. გემს მიხედეთ, პატივცემულებო, გემს… – წერს სარიშვილი.
ცნობისათვის, საქართველოს მესამე პრეზიდენტმა მიხეილ სააკაშვილმა საქართველოში ჩამოსვლა დააანონსა. სააკაშვილი ამბობს, რომ ქვეყანაში სახალხო რეფერენდუმის წინ დაბრუნდება, თუმცა კონკრეტულ თარიღს ის მოგვიანებით დაასახელებს.
კომენტარები