რა უნდა გავაკეთოთ, რომ გასტროენტეროლოგთან მისვლა არ დაგვჭირდეს? – ჯაბა ზარქუა

1. დიაგნოსტიკა – ინვაზიურ პროცედურებს ითხოვს, თავისი ანესთეზიებით, ჰოსპიტალში მოცდით რიგ შემთხვევებში. აღარაფერს ვამბობ იმ აუარება სისხლისა და განავლის ტესტებზე, რომლებიც ასევე არაერთხელ კეთდება თითო პაციენტთან. რაღაცნაირად გული მეწურება ხოლმე როცა “მაგას კვლევები უყვარს ბევრი” ყაიდის ექიმად მივიჩნევი – მე რა კვლევებსაც ვნიშნავ და სპეციფიურ კვლევებს ვარქმევ, ერთი იმდენი განვითარებული ქვეყნის რუტინაა.

2. მკურნალობა – მთელს სფეროს რომ თავი დავანებო და მარტო ნაწლავების ანთებითი დაავადებები ავიღო, ახალი თაობის იმდენად ძვირადღირებული მედიკამენტები შემოდის ხმარებაში, ბარე ორ სპეციალობას გადასწონის ხარჯებით. გაითვალისწინეთ რომ დაავადებების დიდი ნაწილის “განადგურებას” მედიცინა ვერ ახერხებს, მართვას – კი.

3. გართულებები – რიგ კლინიკურ შემთხვევებში დაავადების განმავლობაში არაერთხელაც კი სჭირდება პაციენტს ქირურგია და ჰოსპიტალიზაცია.

4. მულტიდისციპლინური გუნდის საჭიროება – გასტროენტეროლოგია განსაკუთრებით გუნდური საქმეა. რაც მეტი ექიმია გუნდში, დაავადების მართვაც მით უფრო ძვირდება.

5. ფუნქციური გასტროენტეროლოგიური პათოლოგიები – ეს ცალკე გამოვყავი შეგნებულად. არაორგანული გასტრო-პათოლოგიები (გაღიზიანებული ნაწლავის სინდრომი, ფუნქციური დისპეფსია, დაუდგენელი გენეზის აბდომინალგიები თუ თუნდაც ფუნქციური შებერილობა) ასოცირებულია კატასტროფულ ხარჯებთან! ნეიროგასტროენტეროლოგთან ვიზიტისას ერთი ფსიქიატრი გავიცანი ძალიან კარგი ირლანდიელი კაცი და პაციენტებთან მათი ჩარევის ეფექტურობის საზომად ჰქონდა რამდენად შემცირდა ამ პაციენტის სამედიცინო ხარჯები. დიაგრამებს მაჩვენებდა გახარებული – ნახე წინა წელს ამ პაციენტმა 1880 ანალიზი გაიკეთაო და გავამესამედეთო მისი ეს ისტერიული ანალიზები სწორი მუშაობით.

1. სწორი კვების რეჟიმი. საუზმე, სადილი, ვახშამი. სწრაფი კვების ობიექტებისა და ხელოვნური დამატკბობლებით გაძეძგილ სასმელებზე თუ საჭმელებზე უარის თქმა.

2. ფიზიკური აქტიობა, ვარჯიში, მცდელობა წონა არ გაგვექცეს.

3. მენტალურ ჯანმრთელობაზე ზრუნვა! მშვიდი ტვინი უდრის მშვიდ კუჭ-ნაწლავს და პირიქით, განუყოფელი საყვარლები არიან ეს ორი და ჯობია არც ერთი გავაღიზიანოთ ძალით, თორე მეორე აუცილებლად დაიცავს მას და ორივე შეგვიტევს.

4. პოლიფარმაციასთან ბრძოლა. გაუგებარი სამკურნალო თუ შარლატანური საშუალებები კუჭ-ნაწლავის სისტემისთვის შესაძლოა საზიანო აღმოჩნდეს. ნუ ითხოვთ წამლებს უკვდავებისთვის, თორემ სამწუხაროდ განა უარს გეტყვიან – დაგინიშნავენ მართლა და უკვდავებისა რა გითხრათ, მაგრამ მინიმუმ ჯიბე დაგიცარიელდებათ, მაქსიმუმ კი – დროს დაკარგავთ პრობლემასთან ბრძოლაში, მომნელებელ სისტემას დაიზიანებთ.

5. ალკოჰოლი, ნარკოტიკი (თამბაქო აქ შედის) – ორივე კატასტროფულად დიდი პრობლემაა ჩვენი ქვეყნისთვის და ორივეს დამანგრეველი ეფექტი აქვს კუჭ-ნაწლავის სისტემაზე.