კინომცოდნე გოგი გვახარია:
“ეს ისტორია 2 დღის წინ სტუდენტებს ვუამბე (ლექციაზე არა! დაწყნარდით, არაფორმალური შეხვედრა გვქონდა). “ვარდების რევოლუციაზე” მკითხეს რაღაც
მოკლედ, რევოლუცია ახლად დასრულებულია და მიხეილ სააკაშვილის რეიტინგი ძალიან მაღალი. უკვე პრეზიდენტია თუ არ ვცდები. შეხვედრა მოაწყო ენჯეოებთან. მე მაშინ “სოროსის ფონდის” აღმასრულებელი საბჭოს წევრი ვიყავი და მომიწია კანცელარიაში მისვლა. ეს ერთადერთი შემთხვევაა, როცა შევხვდი ხელისუფლების უმაღლეს პირს.
ილაპარაკა ამაზე, იმაზე და მიადგა უნივერსიტეტის თემას. როინ მეტრეველი ახსენა.
“მე ვფიქრობ საპატიო რექტორის თანამდებობის შემოღებას მისთვის. აქ რადიკალიზმი არ ივარგებს. რას იტყვით?”
რექტორის შეცვლის იდეა ყველამ მოუწონა. მაგრამ მოულოდნელად ჩვენი ენჯეოერთიანობა Tea Tutberidze -მ დაარღვია.
თეას ვიცნობდი. “ფსიქოშიც” ყოფილა და ყოველთვის მომწონდა მისი რადიკალიზმი, სიხისტე. საერთოდ, რამდენადაც კაცებში სირბილეს და მორცხვობას ვაფასებ, იმდენად მიყვარს პირდაპირი და “სწორხაზოვანი” ქალები. აქ, საჯაროდ ვერ გავიმეორებ იმ სიტყვებს, რომლებიც გაბრაზებულმა თეამ გამოიყენა მეტრეველის დასახასიათებლად. მაგრამ შინაარსი ასეთი იყო: “რა სისულელეს ლაპარაკობ მიშა! ან თქვენ რას უქნევთ თავს… რა “საპატიო”? იმის მაგივრად რომ საქმე აღძრათ, გაარკვიოთ რეალურად რა ხდება უნივერსიტეტში, საპატიო პენსიაზე უშვებთ?”
ამ შეხვედრაზე ჩემთვის ნაკლებად საინტერესო იყო მეტრეველის თემა. ისიც კი, რომ ამხელა რეიტინგის ახალი ხელისუფლება მაინც ვერ ბედავდა კომუნისტური წარსულის სრულ უარყოფას, რადგან ძველ ჩინოვნიკებთან ზოგს ნათესაური კავშირები ჰქონდა (დედა, მამა, ბებია-ბაბუა), ზოგსაც სჯეროდა, რომ ეს ადამიანები შეიძლება კორუმპირებულები არიან და ქრთამებს იღებდნენ, მაგრამ მაინც ჩვენი კულტურის ნაწილები არიან და არ ღირს მათი გადაკიდება. ქურდების და ნარკომანების “ჩარეცხვა” უფრო ადვილია, უპატრონოს შეიძლება მოერიო, მაგრამ ავტორიტეტი და ოჯახის წევრის კოლეგა, მეგობარი, ხელშეუხებელია.
მოკლედ, პატარა ქვეყანა ვართ და ყველა ერთმანეთის მეგობარი-ნათესავია, ამიტომ ნეპოტიზმთან ბრძოლა დიდი წარმატებით აქ არასდროს დასრულებულა. რაც, ვიმეორებ, არ მიკვირს.
მე ამ შეხვედრას თეას გამო ვერ ვივიწყებ. ერთადერთი იყო, ვინც გაბედა და ხელისუფლების პირველ პირს სიმართლე უთხრა. სხვებიც ფიქრობდნენ ამას, მაგრამ ვერ ბედავდნენ. პირიქით ჩვენ მაშინ გაკვირვებული თვალებით ვუყურებდით თეა თუთბერიძის მორიგ “დემარშს”
ისიც ლოგიკურია რომ ეს ქალი დღეს საქართველოში არ ცხოვრობს.
სტუდენტებს იმიტომ ვუამბე, რომ იცოდნენ როგორი შეშინებული, გადაუწყვეტელი თაობა ასწავლით და რომ არ ვართ ღირსი გავხდეთ მათთვის ავტორიტეტები. და არცაა საჭირო. იცხოვრონ თავიანთი სინდისის მიხედვით.”
კომენტარები