დღეს მეორე მოსმენით საკონსტიტუციო ცვლილებები დაამტკიცა პარლამენტმა, თუმცა, ბეწვის ხიდზე გაიარა “ოცნებამ”, რადგან ზუსტად 116 ხმით დამტკიცდა ცვლილება, მაშინ როცა კანონოპროექტის დამტკიცებამდე რამდენიმე წუთით ადრე 115-მა დეპუტატმა გაიარა რეგისტრაცია.
პარლამენტის თავმჯდომარემ კიდევ ერთხელ მოითხოვა რეგისტრაციის დამოწმება დეპუტატებისგან და როგორც იქნა, კვორუმი შედგა – რეგისტრაცია 119-მა დეპუტატმა გაიარა.
რა მოხდა იმ ათ წუთში, რომელიც კანონპროექტის განხილვის შემდეგ, ხმის მიცემამდე დაიტოვა მმართველმა ძალამ?
როგორც “ალიას” კულუარულად ატყობინებენ, პარლამენტში ფრაქციის თავმჯდომარეებთან უშუალო კომუნიკაცია მიდიოდა და “ოცნება” ყველა შენიშვნაზე თანახმა იყო…
ჯერ კიდევ პირველი მოსმენისას, ირმა ინაშვილს და გია ჟორჟოლიანს ჰქონდათ შენიშვნები და რამდენიმე სიტყვის ჩასწორებას ითხოვდნენ, თუმცა, კანონი მეორე მოსმენაზე ისე გამოიტანა ირაკლი კობახიძემ, მმართველი გუნდის მთავარმა კონსტიტუციონალისტმა, რომ ეს შენიშვნები მასში ასახული არ იყო. მეტიც, როცა გია ჟორჟოლიანმა და ირმა ინაშვილმა ისევ გაიმეორეს შენიშვნები, კობახიძემ განაცხადა, რომ ვერ ხედავს ამ სიტყვების შეცვლის აუცილებლობას, რადგანაც აზრი იგივეა…
თუმცა, ზუსტად ათ წუთში კობახიძემ შეცვალა თავისი აზრი და მეტიც, ჩაასწორა კანონპროექტი და ამობეჭდვაც მოასწრო, რომ ყველა დეპუტატისთვის დაერიგებია.
საქმე ეხება კანონპროექტის მეორე მუხლის მესამე ნაწილს, სადაც გია ჟორჟოლიანის ინიციატივით, შეიცვალა ტერმინი “გადაჭარბების შემთხვევაში” და კანონის იგივე ნაწილში ირმა ინაშვილის ინიციატივით – სიტყვა პროპორციული – ჩანაცვლდა სიტყვა თანმიმდევრულით.
ამჯერად, სიმართლე უნდა ითქვას და კობახიძე მართალი იყო, აზრი არ შეცვლილა, მაგრამ, როგორც გვიყვებიან, “ოცნება” ყველა სიტყვას შეცვლიდა, ოღონდაც პარლამენტს დღეს მეორე მოსმენით მიეღო საკონსტიტუციო ცვლილება და დაემტკიცებია “ნაციონალური მოძრაობისთვის” და ევროპული საქართველოსთვის” რომ მათ გარეშეც შეუძლია კანონის მიღება. თუმცა, მთავარი მაინც ევროპარლამენტი და ამერიკაა, რომელიც დაჟინებით ითხოვდა ცვლილებების მიღებას.
“კობახიძემ იცოდა ინაშვილის და ჟორჟოლიანის მოთხოვნები, ამიტომ, დოკუმენტის ორი სახე იყო გამზადებული, ერთი ძველი, რომელიც მიიღეს პირველი მოსმენით, მეორე კი – ახალი, იმ შემთხვევაში თუ ინაშვილი და ჟორჟოლიანი მოთხოვნებს გაიმეორებდნენ, ცვლილებები გამზადებული და ამობეჭდილიც კი იყო, რადგან არც ერთი ხმის დაკარგვის ფუფუნება არ ჰქონდათ… ამიტომ “მოახერხეს” ათ წუთში ცვლილების შეტანაც, ამობეჭდვაც და დარიგებაც” – გვატყობინებს წყარო.
თუმცა, რამდენიმე დეპუტატისთვის კანონპროექტის მიწოდება მაინც დააგვიანდათ და ეკა ბესელიამ, რომელიც დარწმუნებული იყო, რომ ახალი ვარიანტი, სადაც ორი ცვლილება შევიდა, ჯერ კიდევ არ არის ამობეჭდილი, სიტყვა ითხოვა და თქვა – “კენჭისყრის წინ როცა იცვლება კონსტიტუცია, იმის ღირსად მაინც უნდა ჩააგდო დეპუტატი, რომ მას ის ამობეჭდილი მიაწოდო…” – ეკა ბესელიას ზუსტად 2 წამში მიაწოდეს ამობეჭდილი ვერსია, რომელიც, როგორც ჩვენი წყარო გვატყობინებს, სინამდვილეში, ჯერ კიდევ დილით იყო ამობეჭდილი და გამზადებული დასარიგებლად, იმის ნიშნად, რომ “ოცნება” ყველა თავისი მეგობრის და მომხრის სიტყვას ითვალისწინებს.
ასეა, თუ ისე, მეორე მოსმენით კანონპროექტი მივიღეთ, წინ დარჩა მესამე მოსმენა, რომელიც დღევანდელის გათვალისწინებით, არანაკლებ სანერვიულო იქნება, რადგან გადამწყვეტია და როგორც “ალიას” უყვებიან, ის დეპუტატები, რომლებიც აქამდე დაპირებას სიტყვის სახით სჯერდებოდნენ, კანონპროექტის მხარდაჭერის სანაცვლად, მესამე მოსმენის წინ მყარ გარანტიებს მოითხოვენ.
ალია
კომენტარები