ნანა ჯანელიძის აფხაზეთის თემაზე გადაღებული ფილმის, “იარე ლიზას” ჩვენების შემდეგ, მაყურებელთა ნაწილმა ფილმის შინაარსის გამო, პროტესტის ნიშნად დარბაზი დატოვა. ამის შესახებ ვიდეოც გავრცელდა, სადაც ისმის: “ეს უნდა ანახოთ ბავშვებს?”; “არ მომხდარა ასეთი რამ, აქ ტყუილ-მართალი ერთმანეთშია არეული”…
მომხდარს სოციალურ ქსელში კულტურის, სპორტისა და ახალგაზრდობის მინისტრი, თეა წულუკიანი გამოეხმაურა:
“ამ ფილმის ავტორი ქალბატონი დღეს ჩემგან “იცავს” ქართულ კინოს. ეს ფილმი არ მინახავს და ვნახავ აუცილებლად, ვინაიდან მინისტრი ამ ქვეყნის შვილია და მასაც აქვს უფლება, ჰქონდეს აზრი და ამ აზრის გამოთქმის თავისუფლება (ქალბატონო ნანა!). მით უმეტეს, რომ ბევრი წელი დავახარჯეთ ბევრმა ადამიანმა იმას, რომ სტრასბურგის სასამართლოს ეთქვა სიმართლე – რუსეთი ოკუპაციას აგრძელებს, ანწუხელიძე, სოფრომაძე და სხვები ოკუპანტმა მოკლა და ქართველების ეთნიკური წმენდა ჩაატარა, და რომ აფხაზეთი საქართველოა!!!
ამ დროს, მე იუსტიციაში ვმუშაობდი, თქვენ კი ამ ფილმს იღებდით.
ძალიან დიდი იმედი მაქვს, ეს ფილმი საპირისპიროს არ ამბობს იმისა, რაც სტრასბურგის სასამართლომ თქვა ჩვენზე, ქართველებზე და ჩვენს სიმართლეზე…
მაგრამ ვნახავ და მექნება ჩემი აზრი. ჩემი აზრი თუ არ მოგეწონებათ, მერე მიმართავთ პრემიერ-მინისტრს ღია წერილით და მოთხოვთ მორიგჯერ, რომ გამაჩეროს (ასე გესმით თავისუფლება და შექსპირის სონეტები, არავიძემ რომ კარგად იცოდა)… და ვერ მიიღებთ სასურველ პასუხს.
ის კი ვიცი, და ამის შესახებ პარლამენტის ტრიბუნიდანაც ვისაუბრე წინა კვირაში, რომ ფილმი ჩაწყობით (!), უკონკურსოდ (!) დაიფინანსა რეჟისორმა ნანა ჯანელიძემ პრემიერ გახარიასგან. და ახლა ჩაწყობებზე აწყობილი კინოცენტრის რეფორმას უპირისპირდება. გასაგებია.” – წერს თეა წულუკიანი.
ამასთან, ცოტა ხნის წინ განცხადება გაავრცელა კულტურის სამინისტრომაც:
“სიცრუეა, თითქოს “იარე ლიზას” გადაღება თეა წულუკიანმა ბრძანა” – აცხადებენ სამინისტროში.
კომენტარები