ლევან ჯავახიშვილი, „ალია“
„ალიას“ ესაუბრება პოლიტიკური მოძრაობა „სახალხო ტრიბუნის“ ლიდერი, დავით ჭიჭინაძე.
– მიხეილ სააკაშვილის თავს ახალი ამბები ხდება და რაიმე მოჰყვება ამ ყველაფერს? სამი პრეზიდენტის შეხვედრაზეა ლაპარაკი და სააკაშვილი ამბობს, მოდით, გორის ჰოსპიტალში შევხდეთ მე, გიორგი მარგველაშვილი და სალომე ზურაბიშვილიო. სალომე ზურაბიშვილი ალაპარაკდა საყოველთაო შერიგებაზე, კონსოლიდაციაზე და თავისი საყვარელი „ძიალოგიც“ მოაყოლა. საითკენ მიდის საქმე? არის იმის რეალური შანსი, რომ შეიწყალოს ზურაბიშვილმა სააკაშვილი?
– მე არ მგონია, რომ ეს შეწყალება, შერიგება, რაიმე სასიკეთოს ემსახურებოდეს. ვინ ვის ურიგდება? „ნაცმოძრაობის“ ყოფილ და ახლანდელი წევრებსა და ლიდერებს თუ შერიგებას უწყობენ, ეგ არაფერს ნიშნავს. ეს გარკვეულწილად ტაქტიკური ნაბიჯი თუ იქნება. რეალურად, ჩვენ მოვისმინეთ ირაკლი კობახიძის პასუხი ამ შესაძლო შერიგებაზე – „ნაცებმა“ ბოდიში მოიხადონ წარსულში ჩადენილი დანაშაულებების გამო და მერე საერთოდ გაქრნენ, პირობა დადონ, რომ პოლიტიკიდან წავლენ და შევურიგდებითო. თან თქვა, რომ შერიგების წინაპირობა ეს უნდა იყოსო. სალომე ზურაბიშვილმა რომც შეიწყალოს სააკაშვილი, მას შეუძლია კონკრეტული, დადასტურებული დანაშაული აპატიოს, კონკრეტული დანაშაულის გამო შეიწყალოს, რომლის გამოც უკვე მისჯილი აქვს სასჯელი. სააკაშვილის წინააღმდეგ სისხლის სამართლის საქმეების გამოძიება მიმდინარეობს, მათ გამო ბრალი არ აქვს წაყენებული და ამ საქმეებისთვის გამო ვერ შეიწყალებს, ამის უფლება არ გააჩნია. საბოლოო ჯამში, თუ არ მისცემენ ამ ქვეყანაში ყოფნის უფლებას, რა აზრი აქვს სააკაშვილისთვის ასეთ შეწყალებას? კი იყო საქართველოში ჩამოსვლამდე თავისუფალი და უკრაინაში ცხოვრობდა. მის ბრალს არავინ აღიარებდა დასავლეთში. რა ვიცი, თუ ისევ უკრაინაში დაბრუნდება, ეს მრავალთვიანი ეპოპეა იმით დასრულდება, რომ ჩვენ დავბრუნდებით ისევ არჩევნების წინა პერიოდში, როდესაც „ქართული ოცნება“ აყალბებდა არჩევნებს. საბოლოოდ, გამოვა, რომ „ქართულმა ოცნებამ“ სააკაშვილის ამ სერიალით შეირგო არჩევნები. სააკაშვილის პატიმრობის, შიმშილობის და ავადმყოფობის თემამ, ისედაც გადაფარა ყველა პრობლემა ქვეყანაში, მოპარული არჩევნები, უმძიმესი სოციალური და ეკონომიკური მდგომარეობა, ფასების კატასტროფული ზრდა, პანდემია და ყველა დანარჩენი. „ქართულმა ოცნებამ“ სააკაშვილის ჩამოსვლით ძალიან დიდი ხეირი ნახა.
კომენტარები