“რა არის მოსალოდნელი, თუ არჩევნებში ოცნებამ გაიფორმა გამარჯვება” – ბექა კობახიძე

ილიას სახელმწიფო უნივერსიტეტის თანამედროვე საქართველოს ისტორიის სამაგისტრო პროგრამის თანახელმძღვანელი, პროფესორი ბექა კობახიძე:

რა მოხდა ამ კვირაში:

– ევროინტეგრაცია ოფიციალურად შეჩერებულია;

– პირველად 2008 წლის შემდეგ, ნატოს ერთი სიტყვაც არ უთქვამს ყოველწლიურ დეკლარაციაში, რომ საქართველო მასში გაწევრიანდება;

– ქართულ ჯარს დახმარება გაუჩერა როგორც ამერიკის შეერთებულმა შტატებმა, ასევე ევროკავშირმა;

– კიევში საავადმყოფოს დაბომბვის შედეგად დაღუპულთა გამო სამძიმარი არ გამოუხატავს ხელისუფლების არც ერთ წევრს (Update: საგარეო მინისტრს დაუტვიტავს ინგლისურად, რუსეთის უხსენებლად);

– ხელისუფლების მარიანეტთა მიერ დაფუძნდა ორგანიზაცია “ნეიტრალური საქართველო”. ტელევიზორს, კომპიუტერს თუ უთოს რომ ჩართავ, ყველგან ამას აპიარებენ ხელისუფლების პროპაგანდისტული არხები;

– რუსეთის საგარეო დაზვერვამ გაავრცელა ინფორმაცია, რომ დასავლეთს ოქტომბერში საქართველოს ხელისუფლების შეცვლა უნდა და ხელი არ ახლოთ ქართულ ოცნებასო;

– რუსეთში დაინიცირდა კანონი, რომლის მიხედვითაც, აგენტების კანონის მსგავსად, ფეისბუქის და სხვა სოციალური ქსელების მომხმარებლებს (ჩვეულებრივ ადამიანებს) ევალებათ სახელმწიფო რეგისტრაცია, რათა უნაირო რამის დაპოსტვა-დალაიქებისთვის მერე პასუხი მოსთხოვონ (ასეთი ბაზის შექმნას პაპუაშვილი დაგვპირდა საქართველოში).

ამის იქით რა არის მოსალოდნელი, თუ არჩევნებში ქართულმა ოცნებამ მოახერხა და გაიფორმა გამარჯვება:

– შეგვიჩერდება ევროპასთან უვიზო მიმოსვლა;

– რუსულ კანონს დაამძიმებეენ და განავცრობენ ინდივიდებზე;

– მიიღებენ მედიის კანონს და მოაშთობენ კრიტიკულ მედიას;

– დახურავენ არაკონტროლირებად უნივერსიტეტებს, ხოლო კონტროლირებადი უნივერსიტეტებიდან “კონკურსების” შედეგად გამოაძევებენ არამორჩილ პროფესურას;

– კონსტიტუციიდან ამოიღებენ 78-ე მუხლს, რომელიც ევროატლანტიკურ და ევროკავშირში ინტეგრაციას ითვალისწინებს;

– კონსტიტუციაში ჩადებენ “ნეიტრალიტეტს”;

– დაიწყება ცენზურა, მათ შორის ფეისბუქშიც, და განსხვავებული მოსაზრებების ადამიანების დევნა (ამას ივანიშვილი ხმამაღლა დაგვპირდა);

– გაღრმავდება კორუფციული ჭაობი;

– ამ გარემოებათა გათვალისწინებით, ქვეყნის ყველაზე განათლებული და შემოქმედი ადამიანების მასა დატოვებს საქართველოს, რამდენიმე ასეული ათასი ადამიანი.

ახლა მე ისტორიული წყარო დავწერე, ფაქტობრივად, რომელიც იმედია მომავალში არავის გამოადგება, რადგან ოქტომბერში დემოკრატია გაიმარჯვებს.