“ქვეყანას სუვერენული უფლება აქვს, ვინც არ უნდა, არ შემოუშვას, მაგრამ ხელისუფლებისთვის ტესტია ის, თუ ვისი შემოსვლა აწუხებს და ვისი – არა.” – განაცხადა „ევროპული საქართველოს“ თავმჯდომარემ გიგა ბოკერიამ ჟურნალისტებთან საუბარში.
„თითქოს რეჟიმისთვის ეს ხომ არაფერს წყვეტს, მაგრამ ამ საკითხშიც ცდილობენ ძალის დემონსტრირებას, რომ ამას არ დაუშვებენ. უკრაინასთან მიმართებით, ყველაზე სკანდალური და სამარცხვინო ჟურნალისტის არშემოშვება იყო.
ქვეყანას სუვერენული უფლება აქვს, რომ ვინც არ უნდა, არ შემოუშვას, ოღონდ ტესტი, როგორი ხელისუფლება გვყავს ისაა, ვისი შემოსვლა აწუხებთ და ვისი – არა. გავრილოვის, პოზნერის პუტინთან და სპეცსამსახურებთან დაკავშირებული ფიგურების შემოსვლა არ აწუხებთ – გვიმტკიცებდნენ, არ გქონდა არშემოშვების უფლებაო. უკრაინელი ჟურნალისტი, რომელმაც შესაძლოა, კრიტიკული სიუჟეტი გააკეთოს, ეს აწუხებთ და იყენებენ საკუთარ დისკრეციას. ესაა ამ რეჟიმის სახე“,- განაცხადა ბოკერიამ.
ცნობისთვის, საქართველოს ყოფილი პრეზიდენტის, მიხეილ სააკაშვილის უკრაინელ ადვოკატ ევგენი გრუშოვეცსა და უკრაინელ ჟურნალისტ დიმიტრი გორდონს საქართველოში შემოსვლაზე უარი უთხრეს.
კომენტარები