ამერიკაში მცხოვრები ექიმი, დავით მრელაშვილი:
“ის, რომ ქართველი ხალხის (დიდი უმრავლესობის) სურვილი და არჩევანი ევროპული მომავალია – ეს შინ და გარეთ აშკარა და აღიარებულია – ამას აღიარებს ქვეყნის შიდა ოპოზიცია, მთავრობა, თუ თვით ევროკავშირის ქვეყნები.
ჩემი მოკრძალებული აზრით დღევანდელი აქციის უ მ თ ა ვ რ ე ს ი მიზანი ამ აზრის კიდევ ერთხელ დაფიქსირება არაა (ყველამ გაიგო რომ 85%-ს გვინდა), თუმცა რა თქმა უნდა ერთ-ერთი მნიშვნელოვანი მიზანია.
უ მ თ ა ვ რ ე ს ი მიზანი – იდეოლოგიურად გახლეჩილი ქართველი ხალხის გ ა ე რ თ ი ა ნ ე ბ ა ა საერთო, საშვილიშვილო, ისტორიულად საუკუნეში ერთხელ მოცემული შანსისთვის.
ადრე თუ გეოგრაფიულ/ფიზიკურად იყო საქართველო გახლეჩილი, დაქსაქსული და მტრისთვის ადვილად სახრავი, აწ შეიძლება ითქვას უარესია – ერთ ქალაქში ვცხოვრობთ, ერთმანეთს გვერდს ვუვლით, და გაუცხოვება გვჭირს (“ეს ნაცია”, “ეს ქოცია”).
ვისურვებდი რომ ევროკავშირის და საქართველოს დროშებთან ერთად ძალიან ბევრი ქართული ოცნების დროშა იყოს ამ აქციაზე – ოპოზიციის სხვა წარმომადგენლების სპექტრთან ერთად, რადგან ეს ის დროა როდესაც მგელი და კრავი (“ნაცი” და “ქოცი” ამომრჩეველი) ერთ წყაროდან სვამს წყალს (ევროპა), და თუ საერთო ძალით არ გაუფრთხილდნენ – ეს წყარო დაშრება და დავრჩებით უდაბნოში ისევ ერთმანეთის სისხლის სმის ანაბარა.
შემდეგი მთავარი მიზანი არის რომ ეს იყოს კარგი დასაწყისი მთელი შემდგომი ქმედებების (ხალხის თუ მთავრობის მიერ), რაც შეასრულებს იმ აბსოლუტურად სამართლიან მოთხოვნებს რაც ევროკავშირმა წაგვიყენა.
ყველამ, ყველა დროის საშინაო დავალებაზე უკეთ უნდა დავიმახსოვროთ ეს თვითოული პუნქტი, და ჩვენი წვილი შევიტანოთ მათ შესრულებაში ერთად თუ ცალკ-ცალკე – როდესაც ვხედავთ რომ ნებისმიერი ინდივიდის, სამთავრობო თუ არასამთავრობო სტრუქტურის ქმედებები ეწინააღმდეგება ამ, აბსოლუტურად ცივილიზირებულ და სამართლიან ნაბიჯებს რასაც ევროკავშირი გვთხოვს.
და ბოლოს – ყველაზე დიდი შეცდომა რაც შეიძლება დღევანდელი აქციის ორგანიზატორებმა დაუშვან – არის ამ აქციის ტრიბუნად გამოყენება კონკრეტული პოლიტიკოსების რეიტინგის ამაღლების მცდელობისთვის, რაც გამოიწვევს შიდაპოლიტიკური პოლარიზაციის გაღრმავებს.
უნდა იყოს რაც შეიძლება ცოტა მოყირჭებული ძველი პოლიტიკური ელიტის ყვირილი რომ “ბიძინა რუსი ოლიგარქია”, ან “მიშა მაგარია”, და უფრო მეტი ახალგაზრდა, ახალი თაობის მაქსიმალურად პარტია-ნეიტრალური ახალგაზრდები კონკრეტული, ვერიფიცირებადი ფაქტებით და არგუმენტებით, და არა მოსაზრებებით (ე.წ. ოფინიონებით).
საქართველო ევროკავშირში აუცილებლად შევა, ეს მხოლოდ დროის ამბავია.
აქ საკითხავი ისაა ადრე თუ გვიან – კიდევ რამდენი ათეული ათას ქართველი ახალგაზრდას (რომლებიც დღეს ჯერ კიდევ სკოლაში სწავლობენ) მიეცემა ან მოაკლდება შანსი რომ ევროპული და დასავლური განათლება და გამოცდილება მიიღოს დროულად, რათა შორიდან თუ ახლოდან დაეხმაროს და ფეხზე წამოაყენოს ეს დაუძლურებული ქვეყანა.
ეს მომავლის პოტენციური მადლი თუ ცოდვა – დღეს ჩვენი – ახლანდელი მოზრდილი თაობის კისერზეა. იმედია სწორად გამოვიყენებთ ამ ისტორიულ შანსსა და პასუხისმგებლობას მომავალი თაობის წინაშე.”
კომენტარები