“პარლამენტი სავსეა არარაობებით, მევახშეებით, “ჟუაჩკის” მღეჭავი, ცალ-ცალ კალოშიანი ეკა ჭიჭინაძეებით…” – ლევან ლორთქიფანიძე

პოლიტოლოგი, ლევან ლორთქიფანიე:

ძირს დაგდებულ ადამიანებს, სისხლის გუბეში აღმოჩენილ ახალგაზრდებს წიხლები ურტყეს; კრიმინალურ ბანდებს ჩვენი უმწეო, წაქცეული თანამოქალაქეების ზურგზე “ბატინკებით” გადავლის უფლება მისცეს; ქალები თმით ითრიეს; დაკავებული ადამიანები ცემეს და გაძარცვეს, გააშიშვლეს და აბუქნავეს, ზოგიერთებს გაუპატიურებით დაემუქრნენ; განსხვავებული აზრის მქონე პირებს “ქოლცენტრებიდან” ურეკეს და მკვდარი და ცოცხალი აგინეს; უბედური, ასოციალური სუბიექტები დარაზმეს და ოპონენტებს სადარბაზოებთან დაახვედრეს; იჭერენ ფბ-კომენტარის, პლაკატის დაჯღაბნის გამო, იჭერენ ყველას – სტუდენტიდან დაწყებული, 71 წლის გაგრელი დევნილით დამთავრებული. ისეთ ხალხს არბენინებენ პოლიციასა და სასამართლოს შორის, რომელთაც ამ დაწესებულებათა მისამართი არც უნდა იცოდნენ (მაგალითად, ჩემს მეგობრებსა და მე). მხოლოდ იმიტომ გვექცევიან ასე, რომ აქციაში მივიღეთ მონაწილეობა.

ნახევარი საქართველო აგენტებად გამოაცხადეს; უამრავ ახალგაზრდას სამუშაო ადგილი წაართვეს; გვეუბნებიან, რომ თუ ბიძინა ივანიშვილი არ მოგვწონს, ქვეყნიდან წავიდეთ; ემიგრანტებს ხმის მიცემის უფლებას ართმევენ და კუბოს ამადლიან;

მთელი დასავლეთი მტრად და ბოროტების გოდოლად არის შერაცხული, ყველასთან ხიდი გვაქვს დამწვარი; “ქართული ოცნება” ერთი ერთში იმეორებს ყველაზე ჩამორჩენილი, ყველაზე მდაბიო რუსი “მოლაპარაკე თავების” რიტორიკას. ყვავილებით ამკობენ თემურ ლენგის უზარმაზარ მემორიალს, ხან ჰამასის გვერდით დგანან, ხან გენოციდის შემოქმედ სისხლიან ბენ-გვირს უმშვენებენ გვერდს. “მტრის არმცნობი, მოყვრის მგმობი, / გარეთ მხდალი, შინ ძლიერი”.

ადამიანების დაცინვა, დამცირება, შეურაცხყოფა, აბუჩად აგდება, დეჰუმანიზაცია მოწინავე საქმიანობად აქციეს. დარგის სპეციალისტებს 30 000 ლარიანი ხელფასებით ახალისებენ. “ტროლბოტობა” სპორტის ნაციონალურ სახეობად იქცა.

გირგვლიანის მოსამართლე მთავარ მსაჯულად გვყავს, ადეიშვილის მოადგილე განათლებას განაგებს, პარლამენტი სავსეა არარაობებით, მევახშეებით, კონფორმისტებით, “ჟუაჩკის” მღეჭავი, ცალ-ცალ კალოშიანი ეკა ჭიჭინაძეებით…

ათასი წელი უძლებდა გელათი ათას უბედურებას, ამათმა კი მისი ფრესკები დაალპეს, წვიმის წყალსა და ობის სოკოს შეაჭმევინეს, დავით აღმაშენებლის სახე ჩამოარეცხინეს… ძალით არა, დანაშაულებრივი უპასუხიმგებლობით.

დემოკრატიის უკუსვლასა და დიქტატურის განმტკიცებას თან არნახული სოციალური კრიზისი ახლავს: ძვირდება პირველადი მოხმარების საგნები და მედიკამენტები, იკლებს ჯანდაცვის თუ განათლების ხარისხი და ხელმისაწვდომობა, ათასობით მოქალაქე უმუშევარი რჩება საქართველოში შემორჩენილი უკანასკნელი ინდუსტრიების ეტაპობრივი მოსპობის ფონზე (ერთი წელია სამსახურიდან გათავისუფლებული ორიათასამდე ჭიათურელი მაღაროელი საწარმოში დაბრუნებას და ღირსეულ შრომის პირობებს ითხოვს), უბინაობა და ვალი სიცოცხლეს უწამლავს საქართველოს მოსახლეობის უდიდეს უმრავლესობას, აფეთქებით, დატბორვითა და გასხვისებით ემუქრებიან ჩვენს სასიცოცხლო სივრცეებს, ტყეებსა თუ მდინარეებს მაღალმთიან რეგიონებსა და დიდი ქალაქების შემოგარენში, უამრავი ადამიანი თავს ემიგრაციაში გაქცევით შველის.

ამ ყველაფერს არ ამართლებს ის, რომ ნაციონალები და მათი ანასხლეტები უვარგისი და საზარელი პოლიტიკური ჯგუფი არიან… არ ამართლებს!

უკვე გვიანაა, უკვე ძალიან ბნელა…