“ყველა ის დეპუტატი, რომელიც გულწრფელად არის დაინტერესებული მიხეილ სააკაშვილის გადარჩენით და მისი თავისუფლებით, უნდა იყოს ბრძოლის წინა ხაზზე. მათი სტატუსი არაფერს უნდა განსაზღვრავდეს,” – ამის შესახებ “ნაციონალური მოძრაობის” წევრმა, გიორგი მუმლაძემ ოპოზიციონერი დეპუტატების მიერ საპარლამენტო საქმიანობის დროებით შეწყვეტასთან დაკავშირებით განაცხადა.
როგორც მუმლაძე აღნიშნავს, დეპუტატების გადასაწყვეტია დატოვებენ თუ არა მანდატებს, თუმცა მათ „ქუჩის ბრძოლებში“ ელოდება.
“ზოგადად, პარლამენტში თავიდანვე შესვლა არასწორი იყო, იმიტომ რომ ეს იყო გაყალბებული. რაც შეეხება დღევანდელ სიტუაციას – ჩემი პოზიცია ასეთია, რომ ყველა ის დეპუტატი, რომელიც გულწრფელად არის დაინტერესებული მიხეილ სააკაშვილის გადარჩენით და მისი თავისუფლებით, უნდა იყოს ბრძოლის წინა ხაზზე. მათი სტატუსი არაფერს უნდა განსაზღვრავდეს. ნებისმიერი ტიპის აქტივობაში პარლამენტის წევრები წინა ხაზზე უნდა იყვნენ,” – განაცხადა მუმლაძემ.
რაც შეეხება “ნაციონალური მოძრაობის” რეგიონული ორგანიზაციების წარმომადგენლებთან შეხვედრას – როგორც მუმლაძე აცხადებს, დღევანდელი კონსულტაციების მიზანია, რომ მომავალი დღეები აქტიური და ორიენტირებული იყოს იმაზე, რომ ხელისუფლების წარმომადგენლებს მაქსიმალური დისკომფორტი შეექმნას.
“ეს პროცესი, რაც გუშინდელი სასამართლოს გადაწყვეტილების შემდეგ დაიწყო, რა თქმა უნდა, გრძელვადიანი იქნება და არავითარ შემთხვევაში არ გვაქვს მოლოდინი, რომ სწრაფად დასრულდება. ეს ბრძოლა არ მოიცავს მხოლოდ ცალსახად, ერთი ტიპის აქტივობას. სხვადასხვა ტიპის აქტივობა იქნება. მიხეილ სააკაშვილის თავისუფლებისთვის ყველა მისი ერთგული თანამებრძოლი მზად არის, რომ თავისი შესაძლებლობების მაქსიმუმი გააკეთოს, ამიტომ ამ კონსულტაციების საბოლოო შედეგი იქნება ის, რომ დღევანდელი დღე და სხვა დღეები იყოს აქტიური და ორიენტირებული იმაზე, რომ მაქსიმალური დისკომფორტი შეექმნას „რუსულ ოცნებას,” – განაცხადა მუმლაძემ.
კომენტარები