მიხეილ სააკაშვილის განცხადებას საქართველოში დაბრუნების შესახებ სწორ პიარ-სვლად აფასებს „ლეიბორისტული პარტიის“ ლიდერი შალვა ნათელაშვილი. ამის შესახებ ნათელაშვილმა „ტვ პირველის“ ეთერში, გადაცემაში „საჯარო პოლიტიკა“ განაცხადა.
„ყოველი არჩევნების წინ, ჩვენ ვისმენთ მიხეილ სააკაშვილის ამგვარ განცხადებას დაბრუნებაზე. შემდგომ ვისმენთ არანაკლებ დამაჯერებელ განცხადებას, რომ თუ მისი დაბრუნება გამოიწვევს დესტაბილიზაციას, მას არ უნდა ასეთი დაბრუნება. ამიტომაც ჩვენ გვაქვს სრული საფუძველი ვიფიქროთ, რომ იგივე განვითარდება ახლაც. ეს პიარულად სწორია. იმისათვის, რომ დამუხტოს თავისი მომხრეები და თავისი პარტია, რა თქმა უნდა საჭიროა ასეთი სულიერი საკვები იმედის სახით,“ – განაცხადა შალვა ნათელაშვილმა.
მისი თქმით, სააკაშვილს არ უნდა დაეკარგა საქართველოს მოქალაქეობა და ქვეყანა არ უნდა დაეტოვებინა.
„არასწორი იყო ის, რომ მან დატოვა ქვეყანა და დაკარგა მოქალაქეობა. მაქსიმუმ ერთი-ორი კვირა დაეპატიმრებინათ. მერე მთელი მსოფლიო დადგებოდა ფეხზე, იქნებოდა აქ, იქნებოდა სხვა სიტუაცია და ბევრი რამე შეიცვლებოდა,“ – ამბობს ლეიბორისტების ლიდერი და აღნიშნავს, რომ სააკაშვილის ქვეყნის გარეთ ყოფნის ფაქტორი საქართველოს იმიჯზე უარყოფითად აისახება.
„სანამ გვეყოლება ქვეყნიდან გაძევებული პრეზიდენტები, პირადდაცვა მოხსნილი პრეზიდენტები, (რაც გაუკეთეს მარგველაშვილს), მანამდე არ გვექნება მსოფლიოში სახელმწიფოს იმიჯი,” – განაცხადა შალვა ნათელაშვილმა.
ცნობისათვის, საქართველოს მესამე პრეზიდენტიმა მიხეილ სააკაშვილმა საქართველოში ჩამოსვლა კიდევ ერთხელ დააანონსა.
სააკაშვილი ამბობს, რომ ქვეყანაში სახალხო რეფერენდუმის წინ დაბრუნდება, თუმცა კონკრეტულ თარიღს ჯერჯერობით არ ასახელებს.
კომენტარები