“ქართული სოცქსელები ჯამბალაიაა” – ზურაბ გურული

აშშ-ს მასაჩუსეტის უნივერსიტეტის ქართველი პროფესორი, ზურაბ გურული:

ჯამბალაია ნიუ ორლეანური კერძია. როგორც ამბობენ, ერთ ორშაბათ დილით, უცნობ კრეოლ დიასახლისს თავის სამზარეულოში მთელი კვირის განმავლობაში მორჩენილი სხვადასხვა კერძები მოუგროვებია, ერთ ქვაბში ჩაუძახებია, ბლომად წიწაკით და სხვა სანელებლებით შეუზავებია და ასე მიურთმევია სადილად თავისი ოჯახისათვის. ასე შეიქმნა ჯამბალაია. გემრიელი ნამდვილად არის ეს კერძი. ნოყიერიც…
საშუალო სტატისტიკურმა ქართველმა წაიკითხა გუბანოვას მოპოვებულ ევროპის ჩემპიონობაზე სტატია და უცებ ვერ მიხვდა, რა რეაქცია უნდა გამოეხატა. ქართული სოცქსელები ხომ ჯამბალაიაა, სადაც ღირსების, ინტელექტის, პრინციპების, განათლების, პროვინციალიზმის, უკულტურობის და ა.შ. ნარჩენები ერთ “ქვაბშია” ჩაყრილი და მერე ბლომად აგრესიით ისე შენელებული, რომ სხვა ვერაფრის გემო ვერ იგრძნო ზუსტად, სიცხარის გარდა.
“პროგრესულები” გუბანოვას ადარებენ მბაპეს, ზურაბ დათუნაშვილს, სხვა ნატურალიზირებულ უცხოელ სპორტსმენებს და ამტკიცებენ, რომ ეს თანამედროვე, ბუნებრივი მოვლენაა და საქართველო ბედნიერი და ამაყი უნდა იყოს ამ გამარჯვებით; ქართული სპორტის ისტორიის ახალი ფურცელი შეიქმნა. გუბანოვას მიჰბაძავს უამრავი ქართველი ახალგაზრდა და მის მიერ შექმნილ ფარვატერს გაჰყვება თაობები.
“გოიმები” აღშფოთებულები არიან რუსის გამარჯვებით. მთელ მსოფლიოში რუსები დღეს ნეგატიურად არიან წარმოჩინებული და რატომ უნდა უხაროდეთ რუსი სპორტსმენის გამარჯვება თუნდაც ქართული დროშით, მითუმეტეს, რომ ეს სუფთა მერკანტილურ საფუძველზე მოხდა. საქართველო არ არის ძლიერი, განვითარებული ქვეყანა, რომელიც ნიჭიერ ხალხს უბრალოდ თავშესაფარს და მფარველობას აძლევს, ხელს უწყობს განვითარებაში; საქართველო უბრალოდ პარაკრიმინალური “ოფშორია” პანამასავით.
ფიქრობს საშუალო სტატისტიკური ქართველი. თან “პროგრესულებთან” ფლირტიც ხიბლავს და თან არც აღშფოთება ასვენებს. თუ გუბანოვა ქართული სპორტის ახალი ფურცელია, მაშინ ჩამოსული რუსი ბიზნესმენები რატომ არ არიან ქართული “ბიზმესის” ახალი ფურცლები? ისინი რატომ არ გვიხარიან?
უნიკალური სიტუაციაა. ოკუპანტი ქვეყნის მოქალაქე ოკუპირებულ ქვეყანას იყენებს თავისი პირადი მაქინაციებისათვის მსოფლიო ასპარეზზე გასასვლელად. რატომაც არა.
მშვენიერი პრეცედენტია. პრეცედენტი არა სპორტში, უბრალოდ, მოქალაქეობრივ მორალში. ეს თუ გიხარია და ბუნებრივად მიგაჩნია, სხვა მიმართულებებით რატომ ვერ უნდა “შეისისხლხორცო” ოკუპანტები? მათ ხომ სარგებლობა მოაქვთ …
ნოყიერი კერძია ჯამბალაია. ვერც მიხვდები რა შემოგეჭამა; თევზი, კიბორჩხალა, შრიმპი, ქათმის ფილე, ღორის ძეხვი თუ ნუტრიას კუდი; ისეა აზელილი ეს ყველაფერი ბრინჯში და წიწაკაში, უცებ-უცებ ყლაპავ და ისე გაძღები, ვერც გაიგებ. მერე რა; მთავარია რომ გაძეხი.”