“პუტინის შურისძიება” – “ავადაა ყველა, ვისაც ხანგოშვილის ამბავი “არაქართული” ტკივილი ჰგონია” – ლორთქიფანიძე

ერთ-ერთი მთავარი გერმანული გამოცემა პუტინის შურისძიების უსასტიკეს გამოვლინებად ზელიმხან ხანგოშვილის შემთხვევას მიიჩნევს. Der Spiegel-ის ჟურნალისტები ხანგოშვილს პირდაპირ მოიხსენიებენ ქართველად. ეს ჩვენ გვჭირდება ხოლმე მითითება მის ქისტურ წარმომავლობაზე და ამ ნიშნის გამო ბოლომდე ჩვენიანად ვერ აღვიქვამთ მას, ბოლომდე არ თანავუგრძნობთ მის ოჯახსა და ახლობლებს…

ხანგოშვილი პანკისში დაიბადა, იბრძოდა ჩეჩნეთის მეორე ომში, სადაც თავისი შედეგიანი წინააღმდეგობის წყალობით თავი დაამახსოვრა რუსეთის სპეცსამსახურებს. ბუნებრივია, ომის შემდეგ ასლან მასხადოვის მხარდამჭერ სამხედრო მეთაურს სიცოცხლე გაუმწარეს – 2009 წელს მოწამლეს, 2015 წელს თბილისის ცენტრში რამდენჯერმე ესროლეს (საქმე აღიძრა ჯანმრთელობის მსუბუქი დაზიანების მუხლით, ცინიზმი!), შემდეგ უკრაინაში გაიქცა, უკრაინიდან მოუწია პოლონეთში გადახვეწა, ბოლოს კი ბერლინში დამკვიდრდა იმის იმედით, რომ ევროპის ცენტრში მაინც აარიდებდა თავს მოთვალთვალეებსა და ქილერებს. 2019 წელს ხანგოშვილი ბერლინის ყველაზე ჰარმონიულ და იდილიურ ადგილას, ტირგართენის ტყე-პარკში ზურგიდან ჩაცხრილა რუსეთის მიერ მივლენილმა სპეც.აგენტმა (გერმანულმა მართლმსაჯულებამ მკვლელსა და აგენტს სამუდამო პატიმრობა მიუსაჯა), ხანგოშვილის საქმე დიპლომატიურ სკანდალის თემად იქცა გერმანიასა და რუსეთს შორის…

ფილმის ყველაზე მნიშვნელოვანი რესპონდენტი ხანგოშვილის მეუღლე – ქ-ნი მანანა გახლავთ. გული გამეგლიჯა მისი მოსმენისას … მან დაწვრილებით მოჰყვა, თუ რა პირობებში უწევდათ ცხოვრება ოთხ ბავშვთან ერთად. მშობლები პერიოდულად იღებდნენ მუქარის შემცველ შეტყობინებებს, სადაც ყოფილ მეუღლეებს შვილების სიცოცხლის მოსპობაზე მიანიშნებდნენ. ქალიშვილები ხშირად იძულებულები იყვნენ ქუჩაში თავსაბურავის გარეშე ევლოთ, რათა ზედმეტი ყურადღება არ მიექციათ. ქ-ნი მანანა დროგამოშვებით ვარცხნილობას უცვლიდა თავის პატარებს, რათა გზა-კვალი აებნიათ მდევართათვის… ოჯახი დღემდე იყენებს ამ და სხვა საშუალებებს, სხვა რა შეუძლიათ? მოკლედ, ნამდვილი ჯოჯოხეთი აღწერა ხანგოშვილის ყოფილმა მეუღლემ…

ქართული საზოგადოება ჯანმრთელი და ნორმალური საზოგადოება იქნებოდა იმ შემთხვევაში, თუ ზელიმხან ხანგოშვილის მკვლელობას, მისი შვილების ბედს გულთან ახლოს მიიტანდა, იმ დროის ნახევარს მაინც გამოჰყოფდა ქისტის ტრაგედიისთვის, რაც დარია დუგინას, კრემლის მემილიონეხარისხოვანი პროპაგანდისტის აფეთქების საქმეს დაახარჯა…

მაგრამ ჩვენ ავად ვართ…

ავად არის ყველა, ვისაც დამწვარი შვილის ფერფლთან მამის ხილვა გაუხარდა, ვისაც დუჟი მოერია!

ავად არის ყველა, ვინც მეათასეხარისხოვან, “პაპსა” კვაზიფილოსოფოსს, მაგრამ სიკვდილისა და სისხლისღვრის, საქართველოს მოსპობის აპოლოგეტს მიუსამძიმრა.

ავად არის ყველა, ვისაც ზელიმხან ხანგოშვილის ამბავი სხვისი პრობლემა, “არაქართული” ტკივილი ჰგონია.

იხ. ფილმი: https://www.youtube.com/watch?v=Lk1SCJ_9F4k