“პოლიციელმა სახეში გაშლილი ხელი გამარტყა” – ანტონ ჩეჩინის დასკვნითი სიტყვა

სინდისის პატიმრების პროცესები გრძელდება-სასამართლომ ანტონ ჩეჩინის დასკვნითი სიტყვას მოუსმინეს.
მან მოსამართლეს დეტალურად უამბო, როგორ ჩაუდეს ნარკოტიკი, როგორ მოუწყვეს ჩასაფრება და როგორ ძალადობდნენ მასზე დაკავების დროს სამართალდამცველები, თუმცა, ამ ძალადობისთვის პასუხი არცერთი პოლიციელისთვის არავის მოუთხოვია.

ჩეჩინის თქმით, მას ნარკოტიკი არაკანონიერად ჩაუდეს და შესაბამისად, ბრალს არ ეთანხმება.

მე დამაკავეს ჩამსვეს მანქანაში 3 დეკემბერს, დაახლოებით 9:45 ზე გამოვდიოდი ჩემი სადარბაზოდან, 1 სართულზე შევხვდი უცხო კაცს, იყურებოდა ტელეფონში, გამომყვა, მე წავედი შლაგბაუმისკენ, რომ ცენტრალურ გზაზე გადავსულიყავი, რომ მივდიოდი ამ დროს ჩემ წინ დადგა ორი კაცი, შავ ტანსაცმელში, ერთი იყო სამედიცინო ნიღბით, მომკიდეს ხელი, მითხრეს, ანტონ ჩეჩინ, დაკავებული ხარ, იმიტომ რომ ეჭვმიტანილი ვარ ნარკოტიკების გაყიდვაში, მე ვუთხარი, რომ ეს არაასწორია. ის ადამიანი, რომელიც სადარბაზოში ვნახე, მოვიდა უკნიდან და ჩამკიდა ხელი, ჩავჯექით მანქანაში, 4 პოლიციელი იყო, რაღაცებს ქართულად ლაპარაკობდნენ, მარცხნივ რომელიც იჯდა, გაშლილი ხელი გამარტყა. პოლიციელმა გამომართვა მეტრომანის კარტა და ის გამარტყა სახეში. მითხრა, რომ მე ვწამლავ საქართველოს მოქალაქეებს და ამბობდნენ, რომ მემუქრება სამუდამო პატიმრობა. ამის შემდეგ უკვე დაიწყო ჩხრეკა.

მთხოვდნენ ტელეფონის განბლოკვას, მე უარი ვთქვი, არ ვიცოდი ვინ იყვნენ ეს ადამიანები, მანქანასაც არაფერი ნიშანი არ ჰქონდა, რომ მივმხვდარიყავი ვინ იყვნენ. პირველი ჩხრეკის შემდეგ, როცა ყველაფერი ამოიღეს, მეორედ კიდე გამჩხრიკეს, მითხრეს გამეხადა ქურთუკი და მიმეცა იმისთვის, ვინც მარჯვნივ იჯდა, გავიხადე ქურთუკი და გადავეცი მას. მშვიდად ვიყავი, ვიცოდი, რომ არაკანონიერი არაფერი მქონდა. არაკანონიერად ჩამიდეს ნარკოტიკი, ამას მე არ ვეთანხმები,- განაცხადა ჩეჩინმა.

მანამდე პროცესზე დაიკითხა ის ექიმი, რომელმაც დადო დასკვნა, რომ მისი ჯანმრთელობის მდგომარეობა არის მძიმე.  ცნობისთვის, მას თავის ტვინში კისტურ – ქსოვილოვანი წარმონაქმნი აქვს.

მისი თქმით, ქირურგიული ჩარევის გარდა, პერიოდულობით კვლევების ჩატარება და წარმონაქმნის მუდმივი კონტროლია საჭირო.

“თავის ტვინში ნებისმიერმა წარმონაქმნმა შესაძლოა, პრობლემები გამოიწვიოს, ამიტომ ამოკვეთილი და შესწავლილი უნდა იყოს, თუმცა დანამდვილებით თქმა, რომ კონკრეტულ რისკებს გამოიწვევს, ძნელია. რისკები არსებობს.  რაც შეეხება ქირურგიულ ჩარევასა და მის სირთულეს, ნებისმიერი ჩარევა ქალა-ტვინის არეში, მაღალი რისკით ფასდება, თუმცა ნეიროქირურგიულად ეს როგორც საშუალო დონის საფრთხე, ისე ფასდება.

რაც შეეხება ოპერაციის შემდეგ რეაბილიტაციას, ჰოსპიტალში პაციენტის დაყოვნება 5-7 კვირა გრძელდება, შემდეგ რეაბილიტაცია თვე-თვენახევარი მიმდინარეობს“, – განაცხადა ექიმმა, ედიშერ მაღალაშვილმა.

სასამართლო პროცესი ხვალ, 7 აგვისტოს 11:00 საათზე განახლდება.

შეგახსენებთ, რომ ანტონ ჩეჩინი 2024 წლის 3 დეკემბერს დააკავეს. მას ბრალი სისხლის სამართლის კოდექსის 260-ე მუხლოს მე-6 ნაწილით აქვს წარდგენილი, რაც განსაკუთრებით დიდი ოდენობით ნარკოტიკული საშუალებების შეძენა-შენახვა, ტარებას გულისხმობს და სასჯელის სახედ და ზომად 8-დან 20- წლამდე ან უვადო თავისუფლების აღკვეთას ითვალისწინებს.