პოლიტიკური პროცესი უნდა ამოყირავდეს და ქვემოდან ზემოთ წავიდეს – თამარ ჩერგოლეიშვილი

ზემოდან ქვემოთაა მოწყობილი პარტიებიც.

პარტიული ელიტები სხედან ტელევიზორში და განიხილავენ საკითხებს, რაც ეხება პარტიულ ელიტებს, ან რამაც შეიძლება სარგებელი მოუტანოს პარტიულ ელიტებს.

ამომრჩეველთან მუშაობაც არის ზემოდან ქვემოთ – ელიტა ნიშნავს თბილისში აქციას და მოერეკება აქტივს.

რიგითი ამომრჩევლისთვის და აქტივისტისთვის, თბილისში აქციაზე, ან ყრილობაზე ჩამოსვლაა პარტიულ ცხოვრებაში მონაწილეობის ერთადერთი ფორმა – ისიც იმიტომ, რომ პარტიული ელიტა კმაყოფილი იყოს, რომ ბევრი ხალხი გამოიყვანა, მრავალათასიანი ყრილობა ჩაატარა.

ასეთ პირობებში ყალიბდება სრული უნდობლობა ელიტასა და ამომრჩეველს შორის – ელიტა ამომრჩეველს ცხვრის ფარად თვლის და იყენებს, ამომრჩეველი ამას გრძნობს და ელიტას არ ენდობა.

რაც სამეგრელოს კამპანია ჩავატარეთ, მას მერე, მე და გიგა დინამიკის ამოყირავებას ვცდილობთ და ქვემოდან ზემოთ პროცესის გამართვას.

ამას უკავშირდება პარტიის უკან გაწევა და შინაარსის წინ გამოწევა, რომელსაც პარტია, აქტივისტური ორგანიზაციები, ანალიტიკური ორგანიზაციები და მედია ახორციელებს და ავრცელებს.

ჩვენ არ ვცდილობთ პარტიული ნომრის ირგვლივ ადამიანების კონსოლიდაციას. ჩვენი ამოცანაა შინაარსის ირგვლივ ადამიანების კონსოლიდაცია, როცა საჭესთან შინაარსია და ის შინაარსი პარტიულ ნომრამდე მიდის, ადამიანები თვითონ მიხვდებიან რა ნომერთან დგანან – ჩვენი მითითების გარეშე. მითითების გარეშე მიღებული გადაწყვეტილებები ყველაზე ჯანსაღი და მყარია!

ცალკე აღებული პარტია ვერ ქმნის პოლიტიკას – ჯანსაღი პოლიტიკის შესაქმნელად საჭიროა მუშაობდეს ჯაჭვი, რომელიც შინაარსის გარშემო იკვრება და პარტიაც, ანალიტიკური ცენტრიც, მედიაც და აქტივისტური ორგანიაციებიც ამ შინაარსის განხორციელების ინსტრუმენტებია მხოლოდ და მხოლოდ.

ამას გარდა, ზემოდან ქვემოთ დინამიკის პირობებში ვერ ხდება ადამიანური რესურსის კაპიტალიზაცია – როდესაც რიგით ადამიანებს პროცესში როლი არ აქვთ, ვერ ვიგებთ მათ რა შეუძლიათ, შესაბამისად, ვერც მათ შესაძლებლობებს ვიყენებთ.

იგივე უნდა მოხდეს მთელ ქვეყანაში.

პოლიტიკური პროცესი უნდა ამოყირავდეს და ქვემოდან ზემოთ წავიდეს.

ამისთვის საჭიროა სისტემების სრული დეცენტრალიზაცია და მოქალაქეების როლის გაზრდა.

ამაზე მუშაობს ახალი რესპუბლიკა.”